Қозоғистон Мудофаа вазирлиги Россиянинг ҳарбий ракеталари республика ҳудудида синовдан ўтказилаётганини тасдиқлади. Бу ҳақда informburо.kz хабар берди.
Аввалроқ “Новая газета Европа” нашри Россиянинг “Капустин Яр” ракета синови полигонидан репортаж тайёрлаганди. Унда полигонда синовдан ўтказилаётган зенит ва баллистик ракеталар Қозоғистон томон учиб, Bokeёрд резерватига тушиши таъкидланган. Ушбу ракеталар кейинчалик Украинадаги ҳарбий амалиётларда қўлланиши айтилмоқда.
Қозоғистон мудофаа вазири ўринбосари Шайх-Ҳасан Жазикбаев мазкур маълумотга изоҳ берди.
“Бундай полигон бор, лекин ўзи бошқариладиган ракеталар эмас, оддий ракеталардан фойдаланилади. Сари-Шаган полигони мавжуд, 1993 йилги келишувга асосан 2030 йилгача у ердан синов мақсадида фойдаланиш мумкин. Россия Федерациясининг 110-ўқув маркази. Бу полигон яқинида инфратузилма йўқ, маҳаллий аҳоли ҳам йўқ”, — дейди вазир ўринбосари.
Таъкидланишича, йилига жами 50 соатлик тест синовлари ўтказилади. Вазир ўринбосари бутун Қозоғистон бўйлаб Россия армиясининг 900 нафар ҳарбийси борлигини айтди.
Журналистлар ушбу ракеталар келажакда Украинадаги ҳарбий амалиётларда қўлланадими, деган саволни беришди. Шайх-Ҳасан Жазикбаевнинг аниқлик киритишича, Қозоғистон Мудофаа вазирлигида бундай маълумотлар йўқ.
Изоҳ (0)