“Уммон” гуруҳи хонандаси Зоҳид Рисқиев 2022 йилнинг 29 сентябрь куни BMW автомобилида мудҳиш автоҳалокатга учраган эди. Хонанда автомашинасини Аҳмад Дониш кўчасидан Янгишаҳар кўчасига қараб ҳайдаб кетаётганида бошқарувни йўқотган. Оқибатда тан жароҳатлари олган Зоҳид, унинг икки дўсти касалхонага ётқизилган ва унинг 1994 йилда туғилган Суннат исмли яна бир дўсти воқеа жойида вафот этган. Зоҳид ушбу автоҳалокат оқибатида оғир тан жароҳатлари олиб, 2 ой давомида кома ҳолатида бўлган. Комадан чиққач ҳам у анча пайтгача юра олмади. Хонанда ҳалигача автоҳалокат оқибатларидан даволанади.
Зоҳиднинг рафиқаси Камола Ортиқова “Севимли” каналига берган интервьюсида турмуш ўртоғи мудҳиш автоҳалокатга учрашидан аввал бир қиз билан аҳд-у паймон қилиб, иккинчи марта уйланишни режалаштиргани ҳақида сўзлаб берди.
— Менинг биринчи учрашиб юрган йигитим бу — турмуш ўртоғим. 17 ёшимда тўйда танишиб қолганмиз. 28 ёшгача 12 йил кўришиб юрганмиз. Буни ҳаммадан беркитиб юрардик. Кўчада кўришсак ҳам пинҳона кўришардик, дейди Камола.
Камола 12 йиллик севгилисига турмушга чиқаётганида олдинда уни қандай синовлар кутиб турганини билмаганди.
— Турмуш ўртоғим битта қиз билан иккинчи турмуш қурмоқчи бўлганлар, буни билиб қолганимдан ярим соат ўтиб, авария бўлганларини эшитдим. Уларнинг аҳволи жуда оғир, миялари ўчган эди. Бу энг чўққига чиққан синов бўлган мен учун — устим тирик, ичим ўликдай бўлиб қолгандим. Чунки ўшанда ҳомиладор эдим, қаттиқ сиқилганим учун бола тушиш хавфи бор эди. Лекин болам учун, турмуш ўртоғим учун курашиб, умидимни бир дақиқага ҳам сўндирмадим, дейди Камола.
Зоҳид Рисқиев ҳозирда икки — ўғил ва қиз фарзандни тарбиялаб келмоқда.
Изоҳ (0)