“Ummon” guruhi xonandasi Zohid Risqiyev 2022-yilning 29-sentyabr kuni BMW avtomobilida mudhish avtohalokatga uchragan edi. Xonanda avtomashinasini Ahmad Donish ko‘chasidan Yangishahar ko‘chasiga qarab haydab ketayotganida boshqaruvni yo‘qotgan. Oqibatda tan jarohatlari olgan Zohid, uning ikki do‘sti kasalxonaga yotqizilgan va uning 1994-yilda tug‘ilgan Sunnat ismli yana bir do‘sti voqea joyida vafot etgan. Zohid ushbu avtohalokat oqibatida og‘ir tan jarohatlari olib, 2 oy davomida koma holatida bo‘lgan. Komadan chiqqach ham u ancha paytgacha yura olmadi. Xonanda haligacha avtohalokat oqibatlaridan davolanadi.
Zohidning rafiqasi Kamola Ortiqova “Sevimli” kanaliga bergan intervyusida turmush o‘rtog‘i mudhish avtohalokatga uchrashidan avval bir qiz bilan ahd-u paymon qilib, ikkinchi marta uylanishni rejalashtirgani haqida so‘zlab berdi.
— Mening birinchi uchrashib yurgan yigitim bu — turmush o‘rtog‘im. 17 yoshimda to‘yda tanishib qolganmiz. 28 yoshgacha 12 yil ko‘rishib yurganmiz. Buni hammadan berkitib yurardik. Ko‘chada ko‘rishsak ham pinhona ko‘rishardik, deydi Kamola.
Kamola 12 yillik sevgilisiga turmushga chiqayotganida oldinda uni qanday sinovlar kutib turganini bilmagandi.
— Turmush o‘rtog‘im bitta qiz bilan ikkinchi turmush qurmoqchi bo‘lganlar, buni bilib qolganimdan yarim soat o‘tib, avariya bo‘lganlarini eshitdim. Ularning ahvoli juda og‘ir, miyalari o‘chgan edi. Bu eng cho‘qqiga chiqqan sinov bo‘lgan men uchun — ustim tirik, ichim o‘likday bo‘lib qolgandim. Chunki o‘shanda homilador edim, qattiq siqilganim uchun bola tushish xavfi bor edi. Lekin bolam uchun, turmush o‘rtog‘im uchun kurashib, umidimni bir daqiqaga ham so‘ndirmadim, deydi Kamola.
Zohid Risqiyev hozirda ikki — o‘g‘il va qiz farzandni tarbiyalab kelmoqda.
Izoh (0)