Эл суйган, истеъдодли актёр, устоз санъаткор Тўхтамурод Азизов 7 сентябрь куни бўлиб ўтган “Замин юлдузлари” миллий тақдирлаш маросимида қатнашиб, “Дарё”га берган интервьюсида ҳозир бир-иккита роли билан мукофот олаётган йигитчалар ва йўқолиб кетаётган кино санъати ҳақида аччиқ ҳақиқатларни гапирди.
— “Замин юлдузлари” тақдирлаш маросими деярли 30 йилдирки барча санъаткорларни бир ерга жамлаб келмоқда. Бундай тадбирлар ўтказиб, ижодкорларни эътироф этиш ўзбек санъати ривожига янада ҳисса қўшади, тўғрими?
— Шундай бўлса керак. Менинг ғалати одатим бор, бир нарсани кўрсам, иккинчисини ҳам шунга ўхшатаман. Ҳар йили “Замин юлдузлари” га чақиришади, лекин бормайман. Мен юздан ортиқ кинода рол ўйнаганман, юздан кейин санамаганман. Шунча фильмда рол ўйнаш ҳаммага ҳам насиб қилавермайди. Энг қизиғи, 55 ёшимгача кинода чиқмаганман. Ҳа булар қизиқчи, фақат кулдиради, жиддий рол ўйнолмайди, дейишган-да. Лекин жиддий образларда ҳам чиқдим.
Бир куни шунга ўхшаш тақдирлаш маросимини телевизорда томоша қилиб ўтиргандим. Бошловчи “Йилнинг энг яхши актёри” номинацияси бўйича фалончи деб эълон қилди. 19-20 ёшли бола костюм-шим кийиб чиқди ва мукофотни олди. Кейин ўйлаб қолдим, ёшим катта-ку, ўйлашга ҳаққим бор. Мен бу йигитни на кинода, на бирор тадбирда, на кўча-куйда кўрганман. У қайси кинода рол ўйнади-ю, қачон киноюлдуз бўлиб кетди? Лоақал исмини ҳам билмайман, яхши актёр бўлса биласиз-ку! Бундай актёрни энг яхши бўлмаса ҳам, ўртача актёр деб эълон қилса бўлади-ку! Йўқ, ундай қилмаскан. Ўша йигит кино санъатининг юлдузи экан.
— Шундан кейин бундай тадбирларга чақиришса ҳам бормайман. Эй, сенларнинг ёлғон-яшиғингдан ўргилдим дейман. Мана, бугун биринчи марта келишим. Аслида келмоқчимасдим, фарзандларим, невараларим — ҳаммаси бўлиб 48 та, уйда ҳамма йиғилганди. Шундай тадбирга чақиришганди, яна телефон қилишяпти, боргим келмаяпти десам, боринг, дада, боринг деб қўйишмади. Майли, борсам борақолай деб, костюмимни кийиб келдим. Биринчи қатордан жой берилди, ҳозирча индамай кузатиб турибман, қани нима бўлади. Концертга келдимми, йиғингами, ўзим ҳам билмайман.
Журналистнинг “Балки бугун илк ‘Энг яхши актёр’ мукофотингизни олсангиз ажаб эмас” деган гапига Тўхтамурод Азизов кулиб, қуйидагича жавоб берди:
— Йўқ, мен унга қизиқмайман. Масалан, кинога рол таклифи билан чиқишса, қандай роллигини сўрагач, агар тўғри келмаса, мендан бошқатдан артист ясамоқчимисизлар, деб қўяман, бўлди. Ҳозир қандай кино бор?! Билмайман, ҳеч нимадан хабарим йўқ. Келавердим, дедим-ку, нима бўлишини ҳам билмайман. Энди кирсам, кўриб, нималигини билиб, келаси интервьюда айтиб бераман.
Изоҳ (0)