1998 йилдан бошлаб мунтазам ўтказилган «Замин юлдузлари» миллий мукофоти маълум сабабларга кўра 2003 йилдан кейин тақиққа учраганди. Кўплаб санъаткор, маданият ходими ва спорт усталарини эътироф этадиган тақдимот маросими бу йилдан яна саҳнага қайтди. Режиссёр Саъдулла Абдуллаев бошчилигида ўтказиладиган тақдимот маросимида нафақат ўзбек ва хориж ижодкорлари, спорт усталари ва илм-фан вакиллари ҳам иштирок этишди. «Дарё» мухбирлари «Замин юлдузлари-2022» тақдирлаш маросимида иштирок этиб, фото ва видеорепортаж тайёрлади.
Дастур ана шундай ноанъанавий тарзда очилди. Қизил йўлак, жонли мусиқа, ранг-баранг чироқлар... Ижодкорлар махсус картеж машиналаридан тушиб, қизил йўлакдан ўтишди. Мухлислар эса ўзбек ижодкорларини яқиндан кўриш ва улар билан суратга тушиш бахтига мушарраф бўлди.
Қизил йўлакни биринчилардан бўлиб бошловчилар Нилуфар Сотиболдиева ва Жамшид Умрзоқов босиб ўтишди.
Актриса Ситора Фармонова ҳам қизил йўлакдан ўтди ва уни кўришни истаган мухлислари билан суратга тушди.
Ўзбекистонда хизмат кўрсатган артист Беҳзод Муҳаммадкаримов тақдимотга ўзгача кўринишда ташриф буюрди.
Бокс усталари волидалари билан ташриф буюришди.
«Халқлар дўстлиги» санъат саройи ҳовлисига минглаб мухлислар тўпланди. Улар учун бу оқшом чинакамига юлдузларга бой ўтди.
Актриса Саида Раметова бастакор Султонали Раҳматов ва Дилноза Кубаева билан қизил йўлакдан ўтди.
— Илгари ўтказилган «Замин юлдузлари»ни яхши эслайман. Жуда чиройли ўтарди. Ишончим комилки, бу йилгиси аввалгиларидан ҳам зўр ўтади, — дейди хонанда Мавлуда Асалхўжаева.
Актриса Юлдуз Ражабова тақдимот маросимига «Жалолиддин Мангуберди» сериалидаги партнёри, турк актёри Эмре Кивилжим билан ташриф буюрди. Кўплаб мухлислар уларга бахт тилаб, чиройли жуфтлик эканликларини эътироф этишди.
Тақдимот маросимида нафақат хонанда ва актёрлар, балки юртимизнинг кўзга кўринган сўз усталари ҳам иштирок этди.
Режиссёр Саъдулла Абдуллаевнинг доимий ижодий ҳамкори бўлган актриса Паризода тақдимотга қизлари билан ташриф буюрди. У тақдимот аввалида «Дарё»га берган интервьюсида илк марта томошабин сифатида концерт кўришини таъкидлаб ўтганди. Аммо мухлислар уни саҳнага чиқишини исташди.
Ҳамиша саҳнада ёки экранда кўринадиган юлдузлар мухлисларга ниҳоятда яқин бўлишди.
Ҳамиша ноодатийликка интиладиган режиссёр Саъдулла Абдуллаев мухлисларни ана шундай қаршилади.
Ширин дийдорни соғинган ижодкорлар концертолди учрашувларини ижтимоий тармоқлардаги саҳифаларига муҳрлаб қўйишди.
— Илк марта «Замин юлдузлари» тақдимот маросимида иштирок этяпман. Шахсан менга бу ердаги муҳит, ижодий ёндашув ва мухлисларнинг илиқ муносабати ёқди. Бундан ташқари, энг севимли ижодкорларим билан қизил йўлакдан ўтдим. Аслида бироз тобим йўқ эди, аммо бундай тақдимотни шунчаки ўтказиб юборишни истамадим. Касалликни ҳам унутиб бу ерга келдим, — дейди Дилноза Кубаева.
Гарчи Ўзбекистон маданият вазири Озодбек Назарбеков қизил йўлакдан ўтмаган бўлса ҳам, тақдимотда иштирок этди.
Актёр Беҳзод Муҳаммадкаримов хонанда Рустам Ғойипов билан бирга.
Ўзбекистонда хизмат кўрсатган артист Мирзабек Холмедов 2002 йил ўтказилган «Замин юлдузлари» тақдимот маросимида эътироф этилган.
Режиссёр саҳна безакларидан тортиб, ижро этиладиган дуэтларгача махсус «Замин юлдузлари» тақдимоти учун тайёрлатган. Яъни Ёрқинхўжа Умаров бир гуруҳ ёш истеъдодли қизлар билан дуэт куйлади.
Ўзбекистон халқ артисти Шерали Жўраев бугунги тақдимотдаги илк тақдирланувчи ижодкор бўлди. Унга мукофотни маданият вазири Озодбек Назарбеков топширди.
Шерали Жўраев, Озодбек Назарбеков, Зоҳиршоҳ Жўраев бирга қўшиқ куйлашди. Томошабинлар орасидан жой олган бир гуруҳ санъаткорлар ҳам уларга жўр бўлишди.
Хонанда қўшиқ сўнгида барча мухлисларни юбилей концерт дастурига таклиф этди.
Ундан кейинги мукофот марҳум спорт устаси Мурод Хонтўраевнинг оила аъзоларига топширилди. Саҳнага спортчининг ота-онаси, акаси ва турмуш ўртоғи таклиф қилинди. Ўзбекистон халқ артисти Ёдгор Саъдиев мукофотни топширар экан, спортчининг кенжа ўғли ҳам саҳнага чиқишини сўради. Катта экранда спортчи билан боғлиқ ролик намойиш этилди ва саҳнага унинг кўплаб шогирдлари чиқарилди. «Ниҳол» мукофоти совриндори Малика Эгамбердиева унга атаб қўшиқ ижро этди.
«Замин юлдузлари» тақдимотида илк марта моҳир хаттот учун мукофот топширилди. Шуниси билан аҳамиятлики, бу мукофот нафақат санъаткорларни, балки бошқа соҳа вакилларини ҳам эътироф этади.
«Аристократлар» жамоаси йигитлари ўз чиқишлари билан томошабинлар кайфиятини кўтаришга ҳаракат қилди.
— Бу тақдимот анча йиллар маълум сабаблар, тақиқлар сабаб тўхтатилганди. Бу йил уни ўтказишга жиддий қарор қилдим. Унда тақдирланадиганларни ўзимиз ва кенг жамоатчилик вакиллари танлашади. Энди тақдимотни давом эттириш, янгидан янги «Замин юлдузлари»ни халққа танитиш ниятимиз бор, — дейди режиссёр Саъдулла Абдуллаев.
Мавзуга доир:
Изоҳ (0)