El suygan, iste’dodli aktyor, ustoz san’atkor To‘xtamurod Azizov 7-sentyabr kuni bo‘lib o‘tgan “Zamin yulduzlari” milliy taqdirlash marosimida qatnashib, “Daryo”ga bergan intervyusida hozir bir-ikkita roli bilan mukofot olayotgan yigitchalar va yo‘qolib ketayotgan kino san’ati haqida achchiq haqiqatlarni gapirdi.
— “Zamin yulduzlari” taqdirlash marosimi deyarli 30 yildirki barcha san’atkorlarni bir yerga jamlab kelmoqda. Bunday tadbirlar o‘tkazib, ijodkorlarni e’tirof etish o‘zbek san’ati rivojiga yanada hissa qo‘shadi, to‘g‘rimi?
— Shunday bo‘lsa kerak. Mening g‘alati odatim bor, bir narsani ko‘rsam, ikkinchisini ham shunga o‘xshataman. Har yili “Zamin yulduzlari” ga chaqirishadi, lekin bormayman. Men yuzdan ortiq kinoda rol o‘ynaganman, yuzdan keyin sanamaganman. Shuncha filmda rol o‘ynash hammaga ham nasib qilavermaydi. Eng qizig‘i, 55 yoshimgacha kinoda chiqmaganman. Ha bular qiziqchi, faqat kuldiradi, jiddiy rol o‘ynolmaydi, deyishgan-da. Lekin jiddiy obrazlarda ham chiqdim.
Bir kuni shunga o‘xshash taqdirlash marosimini televizorda tomosha qilib o‘tirgandim. Boshlovchi “Yilning eng yaxshi aktyori” nominatsiyasi bo‘yicha falonchi deb e’lon qildi. 19-20 yoshli bola kostyum-shim kiyib chiqdi va mukofotni oldi. Keyin o‘ylab qoldim, yoshim katta-ku, o‘ylashga haqqim bor. Men bu yigitni na kinoda, na biror tadbirda, na ko‘cha-kuyda ko‘rganman. U qaysi kinoda rol o‘ynadi-yu, qachon kinoyulduz bo‘lib ketdi? Loaqal ismini ham bilmayman, yaxshi aktyor bo‘lsa bilasiz-ku! Bunday aktyorni eng yaxshi bo‘lmasa ham, o‘rtacha aktyor deb e’lon qilsa bo‘ladi-ku! Yo‘q, unday qilmaskan. O‘sha yigit kino san’atining yulduzi ekan.
— Shundan keyin bunday tadbirlarga chaqirishsa ham bormayman. Ey, senlarning yolg‘on-yashig‘ingdan o‘rgildim deyman. Mana, bugun birinchi marta kelishim. Aslida kelmoqchimasdim, farzandlarim, nevaralarim — hammasi bo‘lib 48 ta, uyda hamma yig‘ilgandi. Shunday tadbirga chaqirishgandi, yana telefon qilishyapti, borgim kelmayapti desam, boring, dada, boring deb qo‘yishmadi. Mayli, borsam boraqolay deb, kostyumimni kiyib keldim. Birinchi qatordan joy berildi, hozircha indamay kuzatib turibman, qani nima bo‘ladi. Konsertga keldimmi, yig‘ingami, o‘zim ham bilmayman.
Jurnalistning “Balki bugun ilk ‘Eng yaxshi aktyor’ mukofotingizni olsangiz ajab emas” degan gapiga To‘xtamurod Azizov kulib, quyidagicha javob berdi:
— Yo‘q, men unga qiziqmayman. Masalan, kinoga rol taklifi bilan chiqishsa, qanday rolligini so‘ragach, agar to‘g‘ri kelmasa, mendan boshqatdan artist yasamoqchimisizlar, deb qo‘yaman, bo‘ldi. Hozir qanday kino bor?! Bilmayman, hech nimadan xabarim yo‘q. Kelaverdim, dedim-ku, nima bo‘lishini ham bilmayman. Endi kirsam, ko‘rib, nimaligini bilib, kelasi intervyuda aytib beraman.
Izoh (0)