Мукофотни олганда йиғлаган гримёр, олти номинация ғолиби «Илҳақ», зални турғизган ролик. «Олтин ҳумо» тақдирлаш маросимидаги эсда қоларли ҳолатлар (фото ва видео)

Тошкентдаги «Киночилар уйи»да «Олтин ҳумо» миллий кино тақдимотининг тантанали тақдирлаш маросими бўлиб ўтди.

Кинематография агентлиги, Ўзбекистон киноарбоблари ижодий уюшмаси томонидан ўтказилган «Олтин ҳумо» тақдимотида бош вазир ўринбосари Азиз Абдуҳакимов, маданият вазири Озодбек Назарбеков, Кинематография агентлиги бош директори Фирдавс Абдухолиқов, Киноарбоблар ижодий уюшмаси раиси Матёқуб Матчонов, шунингдек, ўзбек кино ва театр оламининг энг етук намоёндалари, актёр ва актрисалар, ОАВ ходимлари меҳмон бўлишди.

«Дарё» мухбири Феруз Муҳаммад «Олтин ҳумо» тақдирлаш маросимидан репортаж тайёрлади.

Кино ва мусиқа оламининг таниқли вакиллари тантанали маросим олдидан дабдабали қизил йўлакчадан ўтишди.

Маросимда Рихстилла Абдуллаев, Дилноза Кубаева, Алишер Узоқов, Шаҳзода Муҳаммедова, Ўзбекистонда хизмат кўрсатган артист Беҳзод Муҳаммадкаримов ҳамда Лола Элтоевалар бошловчилик қилди.

Ўтган йиллар давомида оламдан ўтган киноижодкорларнинг суратлари ва сурат остида ўқилган таъсирли монолог, тақдирлаш маросимида меҳмон бўлган барчани ўрнидан туриб қарсак чалишига сабаб бўлди.

«Олтин ҳумо — 2021» мукофотига қуйидаги киноижодкорлар муносиб кўрилди.

«Энг яхши анимацион фильм» номинацияси ғолиби «Автосаргузаштлар 4» мультфильми режиссёри Абдулатиф Ҳайдаров деб топилди.

«Энг яхши компьютер графикаси» «Ибрат» фильми учун Дилшод Латифхўжаевга насиб этди.

«Энг яхши кино бастакори» «Рангсиз тушлар» фильми учун бастакор Убайдулла Каримов тақдирланди.

«Энг яхши монтаж иши» номинацияси билан «Тенгиз» фильми монтаж режиссёри Хуршид Алихўжаев «Олтин ҳумо» совриндори бўлди.

«Энг яхши грим рассоми» «Илҳақ» фильми учун Зилола Собирова тақдирланди. Зилола Собирова мукофотни қўлига олгач, «Илҳақ» фильмининг ижодкорларига раҳмат айтиб, йиғлаб юборди. Бу мукофотни жуда ҳам орзиқиб кутгани, ғолиб бўлганига ҳали ҳам ишонмаётгани маълум қилди.

«Энг яхши либос бўйича рассом иши» номинациясида «Илҳақ» фильми Зуҳра Ғаниева ғолиб бўлди. Зуҳра Ғаниева ҳам мукофотни кўзларида ёш билан қабул қилиб олди.

«Олтин ҳумо» совриндори бўлган ижодкорлар тақдимотнинг махсус статуэткасидан ташқари, 10 миллион сўм пул мукофоти билан ҳам тақдирланишди.

«Энг яхши рассом иши» «Қўқон шамоли» фильми учун Исобек Эгамбердиев тақдирланди.

«Энг яхши овоз режиссёри» номинацияси ғолиблиги «Илҳақ» фильми овоз режиссёри Анвар Файзуллаевга насиб этди.

«Энг яхши сценарий» номинациясида эса «Рангсиз тушлар» фильмининг сценарий муаллифи, режиссёр Умид Ҳамдамов тақдирланди.

«Олтин ҳумо»нинг «Энг яхши операторлик иши» номинациясида «Илҳақ» фильми учун Жаҳонгир Ибрагимов ғолиб деб топилди.

«Энг яхши режиссёрлик иши» «Рангсиз тушлар» фильми режиссёри Аюб Шаҳобиддиновга насиб этди.

«Энг яхши аёл роли» мукофотини «Илҳақ» фильми учун Ўзбекистон халқ артисти Дилором Каримова қабул қилиб олди.

«Олтин ҳумо» статуэткаси АҚШ компанияларидан бирида тайёрланган бўлиб, оғирлиги 4 кг атрофида, мукофотга тилла суви югуртирилган.

«Энг яхши эркак роли» «Ибрат» фильми учун Карим Мирҳодиевга насиб этди. Ўзбекистонда хизмат кўрсатган артист Карим Мирҳодиев ушбу мукофот билан кетма-кет иккинчи маротаба тақдирланмоқда. Актёр 2019 йилда «Сабот» фильмидаги бош роли учун ҳам тақдирланган эди.

«Томошабин меҳрини қозонган фильм» дея «Қор ёғмоқда, оппоқ қор» фильми эътироф этилди. Ушбу фильмни марҳум режиссёр Рихсивой Муҳаммаджонов суратга олган эди.

«Олтин ҳумо»да «Йилнинг энг яхши фильми» дея «Илҳақ» тарихий фильми эътироф этилди. Ушбу фильм режиссёр Жаҳонгир Аҳмедов томонидан суратга олинган бўлиб, фильм 2021 йилнинг ноябрь ойида «Листопад» халқаро Минск кинофестивалида фестивалнинг Гран-при ҳамда Беларусь Республикаси президентининг «Кинода маънавият ва инсонпарварлик ғоялари учун» махсус мукофоти билан тақдирланган эди. Мукофотни «Илҳақ» фильмининг режиссёри Жаҳонгир Аҳмедов ҳамда продюсери Зафар Йўлдошев қабул қилиб олди.

Маълумот учун, «Олтин ҳумо» миллий кинотақдимоти биринчи маротаба Ўзбекистон киноарбоблари ижодий уюшмаси томонидан 2019 йил 10 апрель куни ташкил этилган эди. Кинотақдимотда 2017 йил 1 январидан 2018 йил 31 декабрга қадар премьераси бўлиб ўтган давлат ва нодавлат студияларининг тўлиқ метражли бадиий, ҳужжатли, анимацион фильмлари қатнашган эди.