“Яхши ходимга ёлчимадим”. Даврон Кабулов кийим дўкони ёпилгани ҳамда меҳмонхона бизнесини бошлагани ҳақида гапирди (видео)

Шоумен Даврон Кабулов “Дарё”нинг YouTube’даги каналига берган интервьюсида “Космос” жамоасига нега машҳур аъзолар таклиф этилмагани ва унинг ишончини оқламаган инсонлар тезда гуруҳ таркибидан чиқарилиши ҳақида айтиб ўтди.

— Гуруҳга келгунига қадар зўр бўлиб юрган одамга қанча куч сарфласангиз ҳам, меҳнатингиз кўзга ташланмайди. Чунки у алоҳида ижод қилиб юрган пайтида ҳам зўр бўлиб юрганди. Маъруф Носиров жамоаси қўшилмасидан аввал Instagramъда олти мингта обуначиси бор эди. Бугунги кунда уни 370 мингдан ортиқ обуначи кузатади. Дурдона Қурбонова “Миллион”га қабул қилинганда бор-йўғи тўрт мингта обуначиси бор эди. Буни тан оладими- йўқми билмайман, аммо уларнинг машҳурликка эришишида озми-кўпми, жамоанинг ҳам ҳиссаси бор. Лекин улар орасида “Йўқ, мен ўзим онамнинг қорнидан миллионта кузатувчи билан туғилганман”, деб чиқаётганлар ҳам бор. Менга мураббий сифатида тиришиб-тирмашадиган инсон билан ишлаш қизиқ. Қорни тўқ инсон овқат учун астойдил ҳаракат қилмайди, рейтинги бори 100 фоиз кучини жамоага сарфламайди, — дейди Даврон Кабулов. 

“Космос” жамоасининг продюссери Даврон Кабулов қандай феъл-атворли инсонлар билан тил топишолмаслиги ҳақида айтиб ўтди.

— Аъзоликка қабул қилинган инсон минг иқтидорли бўлса-да, унинг ҳаёт тарзи ва феъл-атвори маъқул келмаса, у билан келажакни кўролмайман. Эрталабгача тентираб, айб-ишратини қиладиган инсонларни жамоага қўшилишини истамайман. Кайфият учун уйида озгина спиртли ичимлик ичадиган инсонни тўғри йўлга солиш мумкин. Аммо бу кўчага кириб кетиб бўлган ва ундан қайтишга хоҳиши бўлмаган инсондан воз кечиш керак. Чунки зарарли одатлар ҳам инфекцияга ўхшаб, атрофдагиларни ҳам заҳарлайди. У одамни машҳур бўлишига ҳисса қўшиб, кейин гуруҳдан кетса одамлар сизни айблаб юргандан кўра, тинчгина бошиданоқ уни “чопган” яхши, — дейди Даврон Кабулов. 

Даврон Кабулов санъатдан ташқари, тадбиркорлик билан ҳам шуғулланади. У суҳбат давомида нега эркаклар кийим дўконини ёпгани ва янги очилган хусусий меҳмонхонаси ҳақида ҳам айтиб ўтди.

— Ишлаб чиқаришни тўхтатганимиз йўқ, шунчаки ҳозирча эркаклар кийим дўкони ишламаяпти, холос. Бунинг асосий сабаби ишни юрита оладиган яхши менежерга ёлчимадик. Ўзим жисмонан ҳамма ишга улгурмайман. Битта менежернинг қўли “тормоз”, бошқаси эса ишни умуман юритолмади. Хуллас, ўзимизни ҳам, брендни ҳам қийнагандан кўра, ишни вақтинча тўхтатиб туришга қарор қилдик. Маҳсулотлар ишлаб чиқариляпти ва асосан онлайн савдо орқали мижозларга етказиб бериляпти. Бундан ташқари, жамоамиз учун катта офис керак эди. Айни кунда концерт тайёргарликлари дўкон биносида бўляпти. Узоқ йиллар давомида жаҳон талабларига жавоб берадиган хусусий меҳмонхона қурдим. Даромадимни унга сарфлаганим учун ҳам у узоқ вақт давомида қурилди. Ҳозирча бизнесдаги бор эътиборимни унга қаратяпман, — дейди Даврон Кабулов.