“Миллион” кулги жамоаси сардори Даврон Кабулов маданият ва туризм вазири ўринбосари Баҳодир Аҳмедов билан ўтказилган давра суҳбатида иштирок этиб, санъаткорларнинг муаммолари ҳақида ўз мулоҳазаларини айтиб ўтди.
— Айни кунларда биз санъаткорларга Маданият ва туризм вазирлигидан ва “Ўзбекконцерт” давлат муассасидан амалий ёрдам керак. Орамизда “Халқлар дўстлиги” санъат саройига концерт бериш бўйича иши тушганлар бор. 2021 йилда саройнинг бир кунлик ижара пули 25 млн сўм эди. 2022 йилда бу сумма 40 млн га чиқди. Ҳозир эса саройнинг кунлик ижараси 65 млн сўмни ташкил қилмоқда. Бир ярим йил ичида ижара пули деярли 3 баробарга ошди. Бу масалада сарой директори Исроил ака билан бир неча марта суҳбатлашдим. У инсон саройнинг коммунал тўловлари ошганини сабаб қилиб кўрсатди. Билмадим, саройга кунига шунча коммунал тўлов тўланадими ёки йўқ.
Концерт бериш тизими жуда ачинарли аҳволда. Қўпол қилиб айтганда, “Ўзбеккино”ни жонлантириш бўлимидан ўлик ҳолда олиб чиқиб кетишди. Уни “жонлантириш” учун 100 миллиардлаб субсидиялар ажратилмоқда. Энди навбат концерт тизимига кетяпти, унинг аҳволи ҳам кундан кунга ёмонлашмоқда. Агар вақтида чора кўрилмаса, жонлантириш учун ажратиладиган маблағларнинг ҳеч қандай фойдаси бўлмайди. Бизга ҳозир ёрдам керак.
Куз ойида 20 та концерт ташкилоти концерт берса, уларнинг 19 таси зарар билан ишни якунлаяпти. Пандемия даврига қадар Ўзбекистонда энг кўзга кўринган 60 та концерт ташкилотчилари бўлса, ҳозир уларнинг бор-йўғи 20 таси фаолият юритяпти. Чунки зарарга ҳеч ким концерт қилишни истамайди. Сарой ижара нархини тушириш бўйича бизга амалий ёрдам керак. Бу ҳақда камида 3 та мутасадди раҳбарга мурожаат қилдик. Аммо ҳеч қандай ўзгариш сезилгани йўқ, — дейди “Миллион” кулги жамоаси сардори Даврон Кабулов.
Даврон Кабулов диний эътиқод айрим хонандаларнинг бизнесига айланиб қолаётгани ва исломий тўйларни ўтказиш учун атайин “ўранаётган” санъаткорлар ҳақида эшитгани ҳақида ҳам айтиб ўтди.
— Диний эътиқод айримларнинг бизнесига айланиб қоляпти. Омманинг эътиборини тортиш учун ундан ҳам фойдаланишимиз керак эмас. Яқинда санъаткор қизнинг гапларини эшитиб, даҳшатга тушдим. У “Бир ҳафтадан кейин ўранаман, ундан кейин барча исломий тўйлар меники”, деди.
Эътиқод масаласида ҳеч қандай қаршиликлар йўқ, аммо тарғибот масаласи ҳақида жиддий ўйлаб кўришимиз керак. Ёшларимиз нотўғри йўлга кириб кетяпти деб кўп айтишади. Тўғри йўлни билмагандан кейин нотўғрисидан юради-да.
Яна бир илтимосим бор. Билмадим, бу мантиқан қанчалик тўғри. Аммо соқол масаласида ҳам бир тўхтамга келиниши керак. Яъни эътиқод йўлида соқол қўяётганлар бор, аммо ундан имиж учун фойдаланадиганлар ҳам бор. Масалан, Фаррух Зокиров ва Ғиёс Бойтоевни мўйловсиз тасаввур этолмайман. Аммо Шоҳруххоннинг яккахон концертида унинг соқолини олдиришди. Аммо у ҳам таниганимиздан бери шу имижига содиқ. Сизлардан илтимос, санъаткорларни қўрқитиб қўймайлик, — дейди Даврон Кабулов.
Изоҳ (0)