Эрон хавфсизлик кучлари раҳбари Байрутга сафарида бедарак йўқолди — ОАВ

Эрон хавфсизлик кучлари қўмондони Исмоил Қаани Байрутга сафари чоғида бедарак йўқолган. Бу ҳақда Reuters хабар берди.

Исроил сентябрь ойида Байрутга зарбалар бериб, “Ҳизбуллоҳ” раҳбари Ҳасан Насруллоҳни йўқ қилганидан сўнг, Қаани Ливанга йўл олган. Бироқ ўтган ҳафта охиридаги ҳужумлардан бери у бошқа алоқага чиқмаган. Маълумотни Эрон хавфсизлик хизматининг икки нафар юқори мартабали вакили тасдиқламоқда.

Мансабдорлардан бирига кўра, Қаани 3 октябрь куни бомбардимон пайтида Байрутнинг жанубий чеккасида бўлган. Бу ҳужум “Ҳизбуллоҳ”нинг юқори мартабали вакили Ҳошим Сафиeддинга қаратилган. Аммо амалдорнинг таъкидлашича, Қаани Сафиeддин билан учрашмаган. Эрон ва “Ҳизбуллоҳ” эса шу ҳужумдан кейин Қаани билан боғлана олмаган.

Иккинчи амалдорнинг таъкидлашича, Насруллоҳ ўлдирилгандан сўнг Қаани Ливанга жўнаб кетган. “Ҳизбуллоҳ”нинг кейинги раҳбари Сафиeддин ҳужумга учрагандан кейин Эрон ҳукумати у билан алоқа ўрната олмаган. Расмий равишда “Ҳизбуллоҳ” Сафиeддин билан боғлиқ вазият юзасидан ҳозирча изоҳ бермади.