Исроил “Ҳизбуллоҳ” етакчиси Ҳасан Насруллоҳ ўлдирилган куни унинг қаердалиги ҳақидаги маълумотни гуруҳга киритилган эронлик агентдан олган. Бу ҳақда Франциянинг Le Parisien нашри хабар берди.
Маълум қилинишича, ҳодиса куни Насруллоҳнинг бункери яқинида ўлдирилган “Ҳизбуллоҳ” жангчисини дафн этиш маросими бўлиб ўтган. Дафн маросимидан сўнг Насруллоҳ, Эрон генерали ва “Ҳизбуллоҳ”нинг 12 нафар катта қўмондони бункерда тўпланган. Агент томонидан огоҳлантирилган Исроил разведкаси уларни кузатган. F-35 самолётлари аллақачон ҳужум қилиш буйруғини кутиб, ҳавода бўлган.
“Ҳизбуллоҳ”нинг бутун ҳарбий раҳбарияти штаб-квартирага тўпланишини кутгандан сўнг, Исроил самолётлари ҳар бири 2 тонна оғирликдаги олтита бомба ташлаган. Оқибатда, “Ҳизбуллоҳ” бункери ўрнида 30 метр чуқурликдаги кратер пайдо бўлиб, вайроналар билан тўлган.
Насруллоҳ кўрсатмаларини бажариш ва етказиш учун масъул бўлган одамлар портлашдан сўнг дарҳол у билан алоқани йўқотган, дейди “Ҳизбуллоҳ”га яқин манба.
The New York Times манбаларига таяниб ёзишича, 2006 йилда Иккинчи Ливан уруши тугаганидан кейин Исроил “Ҳизбуллоҳ”га чуқур кириб борган кучли разведка тармоғини яратган. Бунинг шарофати билан ҳарбийлар АҚШга маълумот узатиши мумкин эди. Натижада, 2020 йил январь ойида Ироқда Ислом инқилоби қўриқчилари корпуси махсус кучларининг собиқ қўмондони Қосим Сулаймоний ўлдирилган.
Изоҳ (0)