Исроил ҳужуми оқибатида ҲАМАС ҳаракатининг Ливандаги раҳбари Фатҳ Шариф Абу ал-Амин ҳалок бўлди. Бу ҳақда Al Mayadeen хабар берди.
Тир шаҳридаги фаластинлик қочқинлар лагеридаги Фатҳ Шариф уйига ҳужум қилинган. Исроил ҳужуми оқибатида у билан бирга хотини, ўғли ва қизи ҳам вафот этган.
“ҲАМАС Ливандаги Исломий қаршилик ҳаракати етакчиси ва ҳаракатнинг хориждаги раҳбарияти аъзоси Фатҳ Шариф Абу ал-Амин учун қайғуради. У Ливан жанубига қилинган ҳужум пайтида ўзи ва оиласига қарши қаратилган террорчилик операциясидан сўнг ҳалок бўлди”, дейилади ҲАМАС баёнотида.
Баъзи манбаларнинг хабар беришича, ал-Амин Ливандаги БМТнинг Фаластинлик қочқинларга ёрдам бериш агентлиги мактаб ўқитувчилари касаба уюшмасининг раҳбари лавозимида ишлаган.
Сўннги кунларда Исроилнинг Ливандаги “Ҳизбуллоҳ” раҳбарияти ва ҲАМАС аъзоларини нишонга олиши кучайди. “Ҳизбуллоҳ” етакчиси Ҳасан Насруллоҳ 28 сентябрь куни Исроил ҳарбий-ҳаво кучларининг Байрутдаги ерости қароргоҳига уюштирган ҳужумида ҳалок бўлди. Яҳудий армияси у билан бирга 20 нафар қўмондон ҳам қурбон бўлганини маълум қилди.
28 сентябрь куни Байрутнинг Daxе районига қилган ҳужумида “Ҳизбуллоҳ”нинг юқори мартабали аъзоси Набиль Каук ўлди. У гуруҳнинг “профилактик хавфсизлик бўлими” қўмондони ва ижроия кенгаши аъзоси бўлган.
Исроил армияси 29 сентябрь куни тунда Байрут жануби-ғарбидаги квартирани нишонга олди. Фаластин Озодлик халқ фронтининг сиёсий бюроси аъзолари Нидал Абдел Ал ва Имад Ауда йўқ қилингани ҳақида маълумот берилган. мазкур маълумот ҳали тасдиқланмаган.
Изоҳ (0)