Исроил мудофаа кучлари Байрутдаги “Ҳизбуллоҳ” ҳаракати марказий қароргоҳи биносига зарба берганини маълум қилди.
Бир мунча вақт олдин ҳарбий кучларимиз “Ҳизбуллоҳ” ҳаракатининг маркази бўлган қароргоҳга аниқ зарба берди, дейилади армия вакили Даниэль Ҳагарий эълон қилган баёнотда.
Таъкидланишича, штаб-квартира Ливан пойтахтининг жанубий чеккасидаги турар жой массивида жойлашган. Исроил армияси вакилларининг сўзларига кўра, қароргоҳ бундай ҳудудга атайлаб “аҳолидан тирик қалқон сифатида фойдаланиш стратегиясининг бир қисми сифатида” жойлаштирилган.
Исроил ҳарбийлари “Ҳизбуллоҳ” етакчиси Ҳасан Насруллоҳ Исроил ҳарбий-ҳаво кучлари томонидан берилган зарба вақтида қароргоҳда бўлган-бўлмаганига аниқлик киритмоқда, дейилади Исроил ОАВ тарқатган хабарларда.
Ўз навбатида, Axios портали манбаларга таяниб, зарба нишони Насруллоҳ бўлганини хабар қилди. Исроил томони Байрутдаги ҳужум амалга оширилишидан бир неча дақиқа олдин АҚШни хабардор қилган.
Исроил ҳарбийлари шу ҳафта бошида Ливандаги “Ҳизбуллоҳ”нинг нишонларига зарба бериш учун кенг кўламли операция бошлади. “Ҳизбуллоҳ” жангчилари, ўз навбатида, Исроил ҳудудига ракета отишда давом этмоқда.
Изоҳ (0)