Исроил 30 октябрь куни Ямандан учирилган ва Эйлат шаҳри томон йўл олган ҳусийлар баллистик ракетасини уриб туширгани коинотдаги илк жангга айланди. Бу ҳақда The Telegraph хабар берди.
“Исроил шу ҳафта Ер атмосферасидан ташқарида баллистик ракетани уриб тушириш учун Арроw ракетага қарши мудофаа тизимидан фойдаланган, бу коинотдаги илк жанг бўлди”, — дейилади хабарда.
Шунингдек, АҚШ-Исроил ҳамкорликда ишлаб чиқилган Арроw ракетага қарши мудофаа тизими ўзининг асосий мақсади, яъни узоқ масофали баллистик ракетани юқори баландликда ва юқори тезликда уриб тушириш учун биринчи марта қўлланилмоқда.
Яман ҳусийлари Исроилга қарши уруш эълон қилди
Ғазо секторининг бомбардимон қилиниши сабабли Яман ҳусийлари Исроилга қарши баллистик ракеталар, дронлар билан ҳужум бошлаганини эълон қилди. Яман Қуролли кучлари бригада генерали Яҳё ас-Сар тегишли маълумотни тасдиқлади. У Исроилнинг турли нишонларига қарши баллистик ва қанотли ракеталарнинг катта партияси, шунингдек, кўп сонли дронлар учирилганини айтди.
“Дронлар, баллистик ва қанотли ракеталардан фойдаланган ҳолда ҳаво ҳужуми араб дунёсининг заифлиги ва Исроил билан тил бириктириши фонида Ғазо халқи олдидаги диний, маънавий, гуманитар ва миллий жавобгарлик туйғуси туфайли амалга оширилди. Яман Қуролли кучлари Исроил агрессиясини тўхтатмагунча ракета ҳужумларини давом эттиради”, — деди Яҳё ас-Сар.
Операцияга “Яман халқининг талаблари” сабаб бўлгани қайд этилган.
Изоҳ (0)