Исроил ҳарбийлари Суриянинг Дамашқ ва Ҳалаб шаҳарларидаги халқаро аэропортларга авиазарбалар берди, деб ёзади Тhе National News Суриядаги маҳаллий ОАВга таяниб.
Ўз навбатида, Сурия ҳарбийлари ҳаво ҳужумидан мудофаа тизимларини фаоллаштирган. ОАВ маълумотларига кўра, ҳар икки аэропорт иши тўхтаб қолган.
Қўшимча қилинишича, зарбалар нишони Ливандаги “Ҳизбуллоҳ” ҳаракати учун Эрондан етказиб берилаётган қуроллар бўлиши мумкин.
7-октябрь куни ҲАМАС Ғазо секторидан Исроилнинг жанубий ва марказий ҳудудларига ракета ҳужумлари уюштирди.
Ўнлаб фаластинлик жангчилар Ғазодан юк машиналари ва парапланларда Исроил ҳудудига кириб келди. Бунга жавобан Исроил мудофаа кучлари “Темир қилич” операцияси бошланганини эълон қилди. Исроил расмийлари мамлакат уруш ҳолатида эканлигини расман эълон қилди.
Бир қанча давлатлар, жумладан, Америка Қўшма Штатлари Исроил ва ҲАМАС ўртасидаги жанговар ҳаракатлар Ливан ёки Сурияга тарқалиб, минтақавий можарога айланиб кетишидан хавотирда.
Изоҳ (0)