Швейцария Ташқи ишлар вазирлиги Россия-Украина можаросини тинч йўл билан ҳал қилиш бўйича иккинчи конференцияга тайёрланмаётганини маълум қилди.
Шу билан бирга, вазирлик Швейцария расмийлари ҳали ҳам музокараларни бошлаш учун имконият излаётганини таъкидлади.
“Ҳозирда Швейцария иккинчи тинчлик саммитига ҳозирлик кўрмаяпти. Энди бизнинг мақсадимиз бошқа давлатлар билан биргаликда Украина ва Россия ўртасида музокаралар бошланиши учун шарт-шароит яратишдир”, дейилади Швейцария Ташқи ишлар вазирлиги хабарида.
11 сентябрь куни Германия канцлери Олаф Шольц Россияни иккинчи тинчлик конференциясига таклиф қилишни ёқлади. Кўпчилик тадбир биринчи саммит бўлиб ўтган Швейцарияда бўлиб ўтади, деб тахмин қилганди. Аммо Швейцария бу тахминни инкор этмоқда.
Аввалроқ Швейцария ТИВ халқаро хавфсизлик департаменти раҳбари Габриэль Лучингер навбатдаги саммит Саудия Арабистонида ўтказилиши мумкинлигини айтган эди.
Украина бўйича биринчи саммит 15–16 июнь кунлари Швейцариянинг Бюргенсток шаҳрида бўлиб ўтган эди. Bloombergнинг ёзишича, Украина расмийлари иккинчи саммитни ноябргача ташкил қилмоқчи.
Изоҳ (0)