Россиянинг Челябинск шаҳридаги 68-мактабда болға билан қуролланган ўсмир ўқувчи ва ўқитувчиларга ҳужум қилди. Бу ҳақда “Интерфакс” хабар берди.
Ҳодиса оқибатида тўрт киши жароҳатланган, улар орасида бир нафар ўқитувчи ҳам бор. Ҳолат юзасидан тергов олиб борилмоқда.
“Челябинскдаги 68-мактабда фавқулодда ҳодиса юз берди. Ўқувчи бошқа ўқувчилар ва ўқитувчиларга ҳужум қилди. Жабрланганлар бор. Улар касалхонага ётқизилган ва барча зарур тиббий ёрдам кўрсатилмоқда. Вазиятни шахсан назоратга олдим”, дейди губернатор Алексей Текслер.
Ҳужум содир этган 7-синф ўқувчиси ўзига ҳам жароҳат етказган. У бинога пичоқ, болға ва тўппонча олиб киргани айтилмоқда.
“Ўқувчи болғани мактабга қандай олиб киргани катта савол туғдирмоқда. Нима учун қўриқлаш хизмати бунга эътибор бермаган? Ҳуқуқни муҳофаза қилиш органлари, Таълим вазирлиги, шаҳар маъмурияти ва бола ҳуқуқлари бўйича вакилга вазиятни батафсил ўрганиб чиқиш тўғрисида кўрсатма бердим. Шунингдек, барча таълим муассасаларида текширувлар ўтказиш ҳақида ҳам топшириқ бердим”, деди Текслер.
Изоҳ (0)