Мавритания соҳилларида муҳожирларни олиб кетаётган қайиқ ағдарилиб кетиши оқибатида 15 киши ҳалок бўлди, яна 195 киши бедарак йўқолди. Бу ҳақда CNN нашри хабар берди.
Ҳодиса Мавритания пойтахти Нуакшот яқинидаги денгиз ҳудудида рўй берган. Сув ҳудудини кесиб ўтаётган қайиқ меъёрдан ортиқ йўловчи юклаши ва кучли тўлқинлар оқибатида ағдарилиб кетган.
Халқаро миграция ташкилоти ва Мавритания қирғоқ қўриқлаш хизмати махсус баёнот бериб, ҳалокат содир бўлганини тасдиқлаган. Ағдарилган қайиқдан жами 120 киши қутқариб олингани билдирилган.
“Биз 15 нафар муҳожирнинг ҳалок бўлгани ва Нуакшот яқинида қайиқ ағдарилиши оқибатида 195 кишининг денгизда ғойиб бўлганидан чуқур қайғудамиз”, дейилган Халқаро миграция ташкилотининг Ғарбий ва Марказий Африкадаги ваколатхонаси баёнотида.
Манбада айтилишича, ҳалокатга учраган йўловчилар етти кун аввал Ғарбий Африкадаги Гамбия давлатидан йўлга чиқишган. Ҳалок бўлганларнинг миллати ва шахсига оид маълумотлар ҳали ҳам аниқланмаган.
ХМТ томонидан эълон қилинган баёнотда ҳалокат “Ғарбий Атлантика йўли” деб аталадиган ноқонуний миграция коридорида содир бўлгани айтилади. Унда айтилишича, биргина 2024 йилнинг ўзида Канар оролларига 19 700 дан ортиқ муҳожир ушбу йўналиш бўйича тартибсиз равишда сузиб келган. 2023 йилда эса бундай муҳожирлар сони 7 590 нафар бўлган.
2014 йилдан бери Мавритания йўналишидаги денгиз коридорида юз берган ҳалокатлар оқибатида 4,500 дан ортиқ ноқонуний муҳожирлар ўлими қайд этилган. Фақат ўтган йилнинг ўзида 1,950 киши ҳалок бўлган.
Изоҳ (0)