Лондоннинг “Челси” клуби ўзининг расмий сайти орқали “Атлетико” клуби футболчиси Жоау Феликснинг трансферини эълон қилди.
“Мен “Челси”га қайтганимдан жуда хурсандман ва машғулотларни бошлашни интиқлик билан кутяпман. Мен бу ерда бирга ўйнаган футболчиларни кўряпман ва бу доим ёқимли. Англияда ўтказган вақтим менга жуда ёқди ва дўстларим, оиламга бир кун келиб яна Премьер Лигага қайтишни хоҳлашимни айтгандим. “Челси”га қайтиш ажойиб туйғу ва бундан жуда хурсандман”, дея Феликснинг сўзларини келтиради «Челси» расмий сайти.
Эслатиб ўтамиз, Жоау Феликс 2022/2023 йилги мавсумнинг иккинчи ярмида Лондоннинг “Челси” клубида ижара асосида ўйнаган. 20 учрашувда майдонга тушган футболчи 4 та гол уришга муваффақ бўлган.
Феликс ўтган йилни “Барселона”да ижара асосида ўтказди. Ҳужумчи клуб ва терма жамоа сафида барча турнирларда 54 та ўйинда қатнашиб, 13 та гол ва 7 та голли узатмага муаллифлик қилган. Футболчининг “Атлетико Мадрид” билан тузилган меҳнат шартномаси 2029 йилнинг ёзига қадар мўлжалланган эди.
“Челси” клуби футболчи билан 7 йиллик шартномага имзо чекди.
Transfermarkt порталида берилган маълумотларга кўра, футболчининг бозор қиймати 30 миллион еврони ташкил қилади.
Изоҳ (0)