Joau Feliks London klubiga ko‘chib o‘tdi

Londonning “Chelsi” klubi o‘zining rasmiy sayti orqali “Atletiko” klubi futbolchisi Joau Feliksning transferini e’lon qildi.

“Men “Chelsi”ga qaytganimdan juda xursandman va mashg‘ulotlarni boshlashni intiqlik bilan kutyapman. Men bu yerda birga o‘ynagan futbolchilarni ko‘ryapman va bu doim yoqimli. Angliyada o‘tkazgan vaqtim menga juda yoqdi va do‘stlarim, oilamga bir kun kelib yana Premyer Ligaga qaytishni xohlashimni aytgandim. “Chelsi”ga qaytish ajoyib tuyg‘u va bundan juda xursandman”, deya Feliksning so'zlarini keltiradi «Chelsi» rasmiy sayti.

Eslatib o‘tamiz, Joau Feliks 2022/2023-yilgi mavsumning ikkinchi yarmida Londonning “Chelsi” klubida ijara asosida o‘ynagan. 20 uchrashuvda maydonga tushgan futbolchi 4 ta gol urishga muvaffaq bo‘lgan.

Feliks o‘tgan yilni “Barselona”da ijara asosida o‘tkazdi. Hujumchi klub va terma jamoa safida barcha turnirlarda 54 ta o‘yinda qatnashib, 13 ta gol va 7 ta golli uzatmaga mualliflik qilgan. Futbolchining “Atletiko Madrid” bilan tuzilgan mehnat shartnomasi 2029-yilning yoziga qadar mo‘ljallangan edi.

“Chelsi” klubi futbolchi bilan 7 yillik shartnomaga imzo chekdi.

Transfermarkt portalida berilgan ma'lumotlarga ko'ra, futbolchining bozor qiymati 30 million yevroni tashkil qiladi.