Rolls-Royce компанияси ҳар бир ходимига 700 фунт стерлинг (892 доллар) қийматидаги акцияларини тортиқ қилади. Бу ҳақда Financial Times нашри хабар берди.
Манбада айтилишича, компания сўнгги беш йилликдаги энг юқори йиллик даромадга эришган. Эндиликда ушбу даромаддан ҳар бир ишчи муносиб дивидент олади.
Компания ижрочи директори лавозимига 2023 йилнинг январь ойида Туфан Эргинбилгич тайинлангач ўтказилган ислоҳотлари натижасида Rolls-Royce акциялари қиймати беш баравардан кўпроққа ошган. Муқаддам нефть саноатида ишлаган илғор фикрли раҳбар тайинланиши ва унинг янгича режалари корпорация ишини жонлантириб юборган.
Компания етакчиси дивидендларни тўлаш тартибини қайта тиклаган. Бу тартибнинг мавжудлиги ва амалда ишлаши компаниянинг бўлғуси инвесторлари учун муҳим эканлиги айтилган.
“Муваффақиятимизга ходимларимиз ҳам шерик бўлиши муҳим. Биз келажакдаги муваффақиятимизга қўшган ҳиссангизни эътироф этишни ва ғалабамизда ўйнаган ролингиз учун сизни мукофотлашни истаймиз”, деган рағбатлантириш тизими ҳақида гапирган Туфан Эргинбилгич.
Манбага кўра, Rolls-Royce компаниясининг 2024 йил биринчи ярмидаги операцион даромади олдинги миқдорга нисбатан 74 фоизга ошиб, 1,1 миллиард фунт стерлингни ташкил этган. Расмийлар бу қиймат йил охиригача 2,3 миллиард фунт стерлингга етишини маълум қилган.
Маълумот ўрнида, Rolls-Royce компаниясида айни пайтда 40 мингдан ортиқ ходим ишлайди. Рағбатлантириш доирасида уларга тақдим этиладиган дивидент ҳажми умумий ҳисобда 30 миллион фунт стерлинг (38 млн доллардан ортиқ)ни ташкил этиши тахмин қилинган.
Изоҳ (0)