Покистон Исроилни қўллаб-қувватлаган компанияларни бойкот қилиш учун қўмита тузди. Бу ҳақда Middle East Моnitor хабар берди.
“Покистонда Исроилга ёки фаластинликларга қарши уруш жиноятларини содир этишга бевосита ёки билвосита кўмаклашиши мумкин бўлган бундай компаниялар ва маҳсулотларни аниқлаш учун ҳам қўмита тузилди”, деди бош вазирнинг сиёсий масалалар бўйича маслаҳатчиси Рана Санауллоҳ.
Қарор “Таҳрики Лаббайк Покистон” ҳаракатининг норозилик акциясидан кейин қабул қилинди. Намойишчилар фаластинликларга инсонпарварлик ёрдами кўрсатишни, мамлакатда Исроилга алоқадор ҳар қандай товарларни сотишни тақиқлашни ва яҳудий давлати билан боғлиқ компанияларнинг ишини чеклашни талаб қилганди. Одамлар маъмурлар билан келишувга эришилгандан кейингина намойишчилар тарқалган.
Покистон ҳукумати Исроил бош вазири Биньямин Нетаньяхуни расман террорчи деб эълон қилган. Қарор Исроил раҳбарини фаластинликларга қарши ҳарбий жиноятлари учун жавобгарликка тортишни талаб этади.
“Биз Нетаньяхуни судга беришни талаб қиламиз. Бу шафқатсизликни (Исроилнинг Ғазодаги ҳаракатлари), Исроилни ва унга алоқадор барча кучларни астойдил қоралаймиз”, дейилади Покистон расмийлари хабарида.
Покистон яҳудий давлати билан дипломатик ёки савдо алоқаларига эга эмас. Исломобод Исроил давлатини ҳам тан олмаган. Покистон ҳукумати такрор ва такрор 1967 йилгача бўлган чегараларга асосланган Фаластин давлатини яратиш ғоясини қўллаб-қувватлаб келади.
Изоҳ (0)