АҚШ ҳукумати 2 август куни Велесуэладаги сайловда амалдаги президент Мадурога мухолиф сифатида ўз номзодини қўйган Эдмундо Гонзалесни президент сифатида тан олди. Бу ҳақда Reuters нашри хабар берди.
Манбада айтилишича, Қўшма Штатлар Венесуэла президенти Николас Мадуронинг рақиби ва мухолифат номзоди Эдмундо Гонзалесни президент деб эълон қилган ҳамда сайловда ютиб чиққани билан табриклаган. АҚШ расмийлари Гонзалесни мамлакат аҳолисининг катта қисми қўллаб-қувватлагани, у шубҳасиз мамлакат раҳбари бўлиши кераклигини маълум қилган.
Олдинроқ Венесуэладаги сайлов натижаларини ҳисоблаш муассасалари амалдаги президент Николас Мадуро 51 фоиз овоз тўплаб пойгада ғолиб чиққанини хабар қилган эди. Мадуронинг рақиблари эса овозларни санашда кўзбўямачиликка йўл қўйилгани, халқ Мадуро учун овоз бермаганини айтиб армияни масалани “узил-кесил ҳал қилиш”га чақирган.
АҚШ Давлат котиби Энтони Блинкен мухолифат вакили Эдмундо Гонзалес сайловда яққол устунлик билан ғалаба қозонганини билдирган. Натижалар шаффоф бўлиши учун Каракасдаги маъмуриятдан сайлов протоколларини оммага эълон қилиш сўралган.
“Кўплаб далилларни ҳисобга олган ҳолда, АҚШга ва энг муҳими, Венесуэла халқига шу маълум бўлдики, Эдмундо Гонзалес Уррутиа Венесуэлада 28- июлда бўлиб ўтган президентлик сайловларида энг кўп овоз олган”, — дейилади АҚШ расмийси ҳисоботида.
Венесуэладаги мухолифат айни дамда Эдмуно Гонзалес 90 фоиздан ортиқ овоз билан ғалаба қозонганини даъво қилмоқда. Амалдаги ҳукумат эса Мадуро ғалабаси ифода этувчи якуний баёнотни эълон қилиш билан чекланиб, тўлиқ тафсилотларни ошкор қилмаяпти.
АҚШнинг Венесуэла мухолифатини қўллаб-қувватлаши катта эҳтимол билан Мадуро ҳокимиятига якун ясалишини англатиши мумкин. Агар Мадуро президентликни сақлаб қолган тақдирда ҳам АҚШ мамлакатга янги санкциялари киритиши мумкинлиги тахмин қилинган.
“Биз Венесуэлада демократик меъёрларни қайта тиклаш жараёнини тўлиқ қўллаб-қувватлаймиз ва халқаро ҳамкорларимиз билан биргаликда уни мустаҳкамлаш йўлларини кўриб чиқишга тайёрмиз.
Ҳуқуқ-тартибот ва хавфсизлик кучлари ўз демократик ҳуқуқларини амалга ошираётган фуқароларга нисбатан қўлланиладиган сиёсий зўравонлик қуролига айланмаслиги керак. Ҳар қандай ҳолатда ҳам фуқаролар ва сиёсий номзодларга ҳужум қилишдан тийилиш керак”, — деган АҚШ Давлат котиби Блинкен ўз баёнотида.
Изоҳ (0)