Россия Давлат думаси фуқароликни олган эркаклар учун ҳарбий хизмат муддатини икки йилга узайтирмоқчи. Бу ҳақда парламент қуйи палатаси сайтида маълум қилинди.
Шунингдек, депутатлар янги фуқаролар учун ҳарбий хизматга чақирилиш ёшини оширишни илгари сурган, аммо қанча муддатга эканлиги ҳақида хабар берилмаган. Дума тегишли тузатишларни баҳорги сессия тугагунга қадар, яъни 5 августгача қабул қилишни режалаштирмоқда.
Давлат думаси спикери Вячеслав Володин Россия фуқаролигига қабул қилиш шарти сифатида ҳарбий рўйхатга олишни таклиф этган. Бу Россия фуқароси паспортини олиш билан бир вақтда амалга оширилиши тахмин қилинмоқда.
Маълумот ўрнида, Россияда фуқаролик олган, аммо ҳарбий рўйхатдан ўтмаган 30 мингдан ортиқ собиқ муҳожирлар аниқланган. Уларнинг барчаси мажбурий рўйхатга олинган ва аллақачон 10 мингга яқини Украинага қарши урушга жўнатилган.
Изоҳ (0)