Париж шаҳрида ўтаётган Олимпия ўйинларининг очилиш маросими видеоси YouTube тармоғидан ўчириб ташланди. Бу ҳақда SОТТ манбаси хабар берди.
Манбада айтилишича, аҳоли орасида очилиш маросими тадбиридаги чиқишларга нисбатан норозилик кайфияти кучайиб кетгач, маросим видеоси YouTube’дан ўчирилган. Бутун Олимпия ўйинлари тарихида бу каби ҳолат олдин рўй бермаган.
Видео нима учун ва ким томонидан олиб ташланганига аниқлик киритилмаган. Халқаро Олимпия қўмитаси ҳозирча изоҳ беришга тайёр эмаслигини билдирган.
Очилиш тадбирида намойиш этилган спектакллардан бири Леонардо Да Винчининг “Махфий кеча” сурати асосида шакллантирилган. Унда Исо Масиҳ хочга тортилишидан олдин шогирдлари билан бир даврада ўтиргани тасвирланган.
Очилиш маросимини кузатган аҳолининг катта қисми унда христиан анъаналари бузилгани ва Исо Масиҳ шахсига нисбатан ҳақоратга йўл қўйилганини айтган. Бу мезбон Франция учун шармандали ҳолат экани билдирилган.
Очилиш тадбирида, шунингдек, Исо ва унинг шогирдлари қаторида қадимги юнон худоси Дионис ҳам тасвирланган. Турли динларнинг қоришмаси ва эътиқодга нисбатан таҳқирона муносабат ижтимоий тармоқларда Олимпия ўйинлари ташкилотчиларига нисбатан танқидларни кучайтирган.
Франция епископлари очилиш тадбирларини ачинарли дея баҳолаган. Бундай ҳолат француз христиан черкови шаънини оёқости қилиши айтилган.
“Бу маросим, афсуски, насронийликни масхара қилиш ва таҳқирлаш саҳналарини ўз ичига олади, биз бундан чуқур таассуфдамиз”, дейилган Париждаги католик маъмурияти баёнотида.
Изоҳ (0)