Венесуэлада сайлов натижаларидан сўнг оммавий намойишлар бошланди (видео)

Венесуэлада президентлик сайловлари натижаларидан сўнг намойишлар авж олди, мухолифат вакиллари сайлов натижаларидан норози бўлмоқда. Бу ҳақда BBC хабар берди.

Маълум қилинишича, полиция ходимлари ва ҳарбийлар билан тўқнашувлар бошланган. Miraflores президент саройига кириш йўллари тўсиб қўйилган. Каракас шаҳрининг марказий ҳудудларида таёқ ва “Молотов коктейли” билан қуролланган юзлаб одамлар тўпланган. Кўчаларда машиналар, шиналар, чиқиндилар ёқиб юборилган. Намойишчилар билан қуролланган полиция ўртасида тўқнашувлар юз берган.

Полиция ва ҳарбийлар президент саройи атрофидаги кўчаларни тўсиб, намойишчиларга пластик ўқлар ва кўздан ёш оқизувчи газ гранаталари қўллаган. Намойишчилар бунга тошлар ва “Молотов коктейли” билан жавоб қайтарган.

Лотин Америкасининг бир қатор давлатлари сайлов овозларини санаб чиқишда шаффофлик зарурлигига эътибор қаратиб, сайлов натижаларини қайта кўриб чиқишни талаб қилган. Аргентина Мадуронинг ғалабасини тан олишдан расман бош тортган. Чили сайлов натижалари халқаро кузатувчилар томонидан тасдиқланганидан кейингина тан олинишини қайд этган.

Танқидларга жавобан Каракас Аргентина, Доминикан Республикаси, Коста-Рика, Панама, Перу, Уругвай ва Чилидаги дипломатларини чақириб олган. Венесуэла расмийлари мазкур мамлакатларни сайлов жараёнига аралашишда айблаган. Панама ҳам вазиятга жавобан Венесуэла билан муносабатларни тўхтатиб, дипломатларини чақириб олганини эълон қилган.