Украина томонида жанг қилаётган “Россияга озодлик” легиони ва “Сибир батальони” 12 мартга ўтар кечаси Россия чегарасини кесиб ўтиб, рус армияси билан тўқнашганини маълум қилганди. Россия Мудофаа вазирлиги ҳолат юзасидан баёнот берди. Бу ҳақда “РИА Новости” хабар берди.
Мудофаа вазирлигига кўра, Украина “хавфсизлик кучлари” Белгород ва Курск вилоятларига бостириб киришга уринган. Аввалроқ Украина разведкаси юқоридаги тузилмалар Россия фуқароларидан ташкил топганини айтганди.
“Москва вақти билан эрталаб соат 03:00 ларда танклар ва зирҳли жанговар техникалар кўмагида тинч аҳоли нишонларини шиддатли ўққа тутган Украина террорчилик тузилмалари Россия ҳудудига бостириб киришга ҳаракат қилди.
Улар Белгород вилоятидаги Одноробовка, Нехотеевка ва Сподарюшино аҳоли пунктлари ҳудудларида бир вақтнинг ўзида уч йўналишда ҳужум қилишга уринган. Россия ҳарбийлари барча ҳужумларни қайтарди, душманга авиация, ракета кучлари ва артиллерия билан зарба берди. Давлат чегараси бузилишига йўл қўйилмаган. Украина томонидан чегарадош Одноробовка ҳудудида 60 га яқин ҳужумчи, Нехотеевка ҳудудида учта танк ва бир бронетранспортёр, Сподарюшино ҳудудида эса яна иккита танк йўқ қилинган”, — дейилади баёнотда.
Бундан ташқари, эрталаб соат 08:00 да Курск вилоятининг Тёткино ҳудудидага киришга уринган Украина “саботаж ва разведка гуруҳлари”нинг тўртта ҳужуми қайтарилгани айтилган.
“Душман орқага силжиган ва катта йўқотишларга учраган”, — дейилади хабарда.
Изоҳ (0)