“Россиядаги жиноий диктатура режимини тинч йўл билан ағдариб бўлмайди”: “Россияга озодлик” легиони, “Сибир батальони” Курск ва Белгородда операция бошлади (видео)

Украина томонида жанг қилаётган “Россияга озодлик” легиони ва “Сибир батальони” 12 мартга ўтар кечаси Россия чегарасини кесиб ўтиб, рус армияси билан тўқнашганини маълум қилди. Бу ҳақда The Moscow Times хабар берди.

Россия Федерациясидаги жиноий диктатура режимини тинч йўл билан ағдариб бўлмайди, деб айтган эдик. Уни фақат қўлда қурол билан тинчитиш мумкин. Бу тунда биз ваъдани бажаришга киришдик. Россия ҳудудида шиддатли жанглар кетмоқда, — дейилади “Сибир батальони” Telegram каналида.

“Россияга озодлик” легиони вакиллари “режимдан еримизни сантиметр-сантиметригача қайтаришни ваъда берамиз”, — деди.

Диверсантлар Белгород ва Курск вилоятларида чегарани бузиб ўтишга уринган, — деб тасдиқлади россияпараст WarGonzo Telegram канали ҳуқуқ-тартибот идораларидаги манбаларга таяниб.

Унинг сўзларига кўра, тахминан соат 03:00 ларда Харьков вилояти Одноробовка қишлоғидан олдинга силжиётган 50 кишилик гуруҳ Белгород вилояти чегарасига ҳужум қилган.

Украинадан келган отрядлар юк машиналари ва зирҳли машиналарда эди, — дейди “Сладков+” канали. 

Россиянинг бошқа З-каналларига кўра, диверсантлар танклар ва бронетранспортёрларда бўлган. “Сладков+” отрядлар чегарани бузиб ўта олмаганини ва рус кучлари бир нечта зирҳли техникани йўқ қилганини ёзмоқда.

Курск вилоятидаги жанг Теткино қишлоғи яқинида эрталаб соат 08.00 ларда бошланган. Душман уч томондан чегарани бузиб ўтишга уринган. Ҳимоячиларимиз томонидан муросасиз отишма билан кутиб олинган. Бироқ, алоҳида отишмалар, ўт очиш ҳолатлари ҳозиргача давом этмоқда, — деб хабар беради WarGonzo. 

Шунингдек, тўқнашувлар чоғида икки киши жароҳатлангани, улардан бири Теткино қишлоғида яшаши, иккинчиси ҳақида ҳозирча маълумот йўқлиги айтилмоқда.

Давлат думасининг собиқ депутати Илья Пономаревнинг таъкидлашича, “Россияга озодлик” легиони ва “Сибир батальони” Белгород ва Курск вилоятларига кирган. Хусусан, улар Белгород вилоятидаги Лозовая Рудка чегарасини назоратга олган. Шунингдек, Россия кўнгиллилар корпуси ҳам Россия ҳудудига кириб келгани айтилмоқда.

Украина разведкаси вакили Андрей Юсовнинг айтишича, санаб ўтилган барча тузилмалар Россия фуқароларидан иборат бўлгани сабабли мустақил бўлинмалар сифатида ишлайди. 

Эҳтимол, ҳозир бу бўлинмаларнинг қўшма операцияси олиб борилмоқда, — деди Юсов. 

Россия ҳукумати Украина билан чегарадаги жанглар ҳақида расман хабар бермади.