26 июль куни Европа Иттифоқи (ЕИ) Россиянинг музлатилган активларидан олинган дастлабки 1,5 миллиард евро даромадни Украинани қўллаб-қувватлаш учун юбормоқда. Бу ҳақда Еврокомиссия президенти Урсула фон дер Ляйен Х тармоғида маълум қилди.
ЕИ Украина билан бирга. Бугун биз музлатилган Россия активларидан 1,5 миллиард еврони Украинани мудофаа ва реконструкция қилиш учун ўтказмоқдамиз. Кремль пулларидан Украина ва бутун Европани яшаш учун хавфсизроқ жойга айлантиришда фойдаланиш энг муносиб қарордир, дейилади баёнотда.
ЕИ баёнотида айтилишича, блок Украинани қўллаб-қувватлаш учун Россиянинг музлатилган активларидан олинган 1,5 миллиард евро миқдоридаги биринчи тўловни ажратган. ЕИ операторлари ва марказий қимматли қоғозлар депозитарийлари томонидан олинган ушбу тушумлар 23 июль куни Euroclear’дан дастлабки тўлов сифатида тақдим этилган.
Маълум бўлишича, Украина бу пулни тўғридан-тўғри олмайди, у Европа тинчлик жамғармаси ва Украина жамғармаси орқали Украинанинг ҳарбий салоҳиятини қўллаб-қувватлаш, шунингдек, мамлакатни қайта тиклашни қўллаб-қувватлаш учун йўналтирилади.
ЕИ олий вакили Жосеп Боррелнинг қўшимча қилишича, бу пуллар эвазига ЕИ устувор ҳарбий техника сотиб олишни молиялаштириш, шунингдек, Украина ишлаб чиқаришини қўллаб-қувватлашни режалаштирмоқда.
Россиянинг музлатилган активлари
Аввалроқ Бельгиянинг Euroclear депозитарийси Россия активларидан Украинага тушадиган даромаднинг биринчи траншини эълон қилган эди. Июль ойида 1,55 миллиард евро миқдоридаги ҳисса ваъда қилинган. Еврокомиссия вакили Кристиан Виганд ҳам яқин ҳафталарда Россиянинг музлатилган активларидан тушган даромаднинг биринчи миқдорини Украинага ҳарбий ёрдам учун ўтказишини айтган.
Украина мудофаа вазири Рустем Умеровнинг сўзларига кўра, Россиянинг музлатилган активлари бўйича фоизларнинг умумий миқдори йилига тахминан 2,5-3 миллиард еврони ташкил қилади. Улар биринчи навбатда пулни ўқ-дорилар, ҳаво ҳужумидан мудофаа тизимлари ва Украина ишлаб чиқарувчиларини қўллаб-қувватлашга сарфлашни режалаштирмоқда.
Изоҳ (0)