Европа Иттифоқи Россиянинг музлатилган активларидан тушган даромаддан Украинага ёрдам бериш учун фойдаланишни маъқуллади. Бу ҳақда “РИА Новости” хабар берди.
Маълум бўлишича, маблағнинг 90 фоизи Украина армиясига йўналтирилади. Россия-Украина уруши бошланганидан кейин ЕИ ва G7 давлатлари Россиянинг қарийб 300 миллиард евролик валюта захираларини музлатиб қўйган. Тахминан 200 миллиард евро ЕИнинг Euroclear ҳисобларида.
Иттифоқ аъзолари музлатилган Россия активларидан фақат Украинани тиклашда фойдаланиш йўлларини муҳокама қилишган. Европа Марказий банки Украина армиясини қўллаб-қувватлаш учун ушбу маблағлардан фойдаланиш евро обрўсига хавф туғдириши ҳақида огоҳлантирган.
Май ойи бошида ЕИ аъзолари Киевга ҳарбий ёрдам кўрсатиш учун Россия активларидан тушган даромадларни ишлатиш бўйича келишиб олгани айтилган эди.
Кремль бундай қарорларнинг қабул қилиниши халқаро ҳуқуқнинг барча нормалари бузилиши эканини таъкидлаган. Россия ТИВ раҳбари Сергей Лавровга кўра, Москва бунга жавобан Ғарб давлатларининг Россияда музлатиб қўйилган маблағларини қайтармаслиги мумкин.
Изоҳ (0)