Қозоғистон Миллий хавфсизлик қўмитаси собиқ раиси, давлатга хиёнат ва ҳокимиятни эгаллаб олишга уринишда айбланган Карим Масимов Қозоғистон президентига мактуб йўллаб, авф этишни сўради. Бу ҳақда “Informburo.kz” хабар бермоқда.
“2024 йилнинг март ойида у (Карим Масимов) Қозоғистон президенти Қосим-Жўмарт Тўқаевга афв этиш тўғрисида илтимоснома юборган”, — дейилади хабарда.
Масимовга нисбатан Жиноят кодексининг 218-моддаси 3-қисми 3-банди (жиноий йўл билан олинган пул маблағларини ва бошқа мол-мулкни легаллаштириш) ва 366-модда 4-қисм (алоҳида йирик миқдорда пора олиш) билан дастлабки тергов ҳаракатлари давом этмоқда.
2023 йилнинг апрель ойида Остона суди Карим Масимовни давлатга хиёнат, ҳокимиятни зўравонлик билан эгаллаб олишга уриниш, ҳокимият ва мансаб ваколатини суиистеъмол қилишда айблаб, 18 йилга озодликдан маҳрум қилганди. Унинг ўринбосарлари Ануар Садиқулов, Даулет Эргожин ва Марат Осипов ҳам қамоқ жазосига ҳукм қилинган. Масимовга нисбатан очилган жиноий иш “ўта махфий” тоифага киритилган. У Қозоғистондаги январь воқеаларининг асосий ташкилотчиси сифатида кўрилмоқда. Ўшанда 238 киши вафот этганди.
Изоҳ (0)