Қозоғистон Мудофаа вазирлиги ҳарбий ёшдаги фуқароларга нисбатан уюштирилган рейдлар юзасидан тушунтириш берди. Бу ҳақда Tengrinews хабар берди.
Вазирлик ижтимоий тармоқларда ёшларнинг қўлга олинииб, ҳарбий идораларга мажбуран етказилаётгани акс этган видеоматериалларга муносабат билдирди.
Мудофаа вазирлигига йилига икки марта муддатли ҳарбий хизматга чақиришнинг амалдаги тартибини тушунтириш ваколати берилган. Муддатли ҳарбий хизматга чақириш кампанияларида айрим ҳолларда тегишли равишда хабардор қилинган фуқароларнинг маҳаллий ҳарбий бошқарув органларига ўз вақтида етиб келмаслиги ҳолатлари учраб туради.
Бунга ҳарбий ёшдаги фуқароларни ҳисобга олишда уларнинг кўпчилиги рўйхатдан ўтган жойида яшамаслиги, кўчганида эса янги яшаш манзили бўйича рўйхатга олинмагани ҳам сабаб бўлмоқда.
Амалдаги қонунчиликка мувофиқ, чақирув варақасини шахсан топширишнинг иложи бўлмаса, уларнинг келишини таъминлаш ички ишлар органларига юклатилади, — дейилади баёнотда.
Вазирлик рейдлар чоғида фуқаролар ички ишлар ходимларининг қонуний талабларига бўйсунмай, қаршилик кўрсатаётганидан шикоят қилди.
Бундай ҳолларда милиция ходимларига уларни мажбуран ушлаш ва етказиш ҳуқуқи берилган. Чақирув комиссияси уларнинг мақомини белгилайди. Муддатли ҳарбий хизматга чақириш учун асослар бўлмаса, уйига юборилади, асослар мавжуд бўлса, тиббий кўрикдан ўтиш ва чақирув доирасидаги бошқа тадбирларни амалга ошириш учун йўналтирилади, — дея қўшимча қилди вазирлик.
Қозоғистонда қонунчиликда мажбурий ҳарбий хизматни ўташдан бўйин товлаганлик учун маъмурий ва жиноий жавобгарлик назарда тутилган.
Шундан келиб чиқиб, фуқаролардан амалдаги қонунчилик талабларига риоя этишларини ҳамда ёлғон маълумотларни тарқатмасликни сўраймиз, — дея хулоса қилди Мудофаа вазирлиги.
Изоҳ (0)