Isroilning Halab (Suriya) yaqinida uyushtirgan havo hujumlari oqibatida mamlakatga maslahatchi sifatida yuborilgan Eron Islom inqilobi qo‘riqchilari korpusi rasmiysi halok bo‘ldi. Bu haqda Eron ommaviy axborot vositalariga tayanib, CNN xabar berdi.
Marhum Said Abyar 3-iyun kuni uyushitirilgan havo hujumida halok bo‘lgan. U aprel oyida Isroil Damashqdagi Eron elchixonasini bombardimon qilganidan keyin yahudiy davlati tomonidan o‘ldirilgan birinchi eronlik hisoblanadi. Said Abyar Eronning Quds kuchlari a’zosi hisoblanib, 2012-yildan beri Suriyada bo‘lgan.
Isroil aviatsiyasining iyun oyi boshida Suriyaga uyushtirgan hujumida 17 kishi halok bo‘ldi, 15 kishi yaralandi. Qurbonlar orasida iroqliklar, suriyaliklar va “Hizbulloh” aʼzolari bo‘lgan, deya xabar beradi Suriya inson huquqlari observatoriyasi. Hujum nishoni mis zavodi va qurol ombori bo‘lgani aytilmoqda.
Suriyada 2011-yilda fuqarolar urushi boshlanganidan buyon Eron Suriya prezidenti Bashar al-Asadni qo‘llab-quvvatlash uchun harbiy maslahatchilarini jo‘natdi. Isroil so‘nggi yillarda Suriyadagi Eron va “Hizbulloh” nishonlariga bir necha bor zarbalar bergan.
Eslatib o‘tamiz, 1-aprel kuni Isroil Damashqdagi Eron konsulligiga aviazarba bergandi. Hujum oqibatida 11 kishi, jumladan, 2016-yilgacha Livan va Suriyadagi “Quds” elita kuchlariga rahbarlik qilgan Eron harbiy maslahatchisi general Muhammad Rizo Zohidiy, uning o‘rinbosari general Muhammad Hodi hoji Rahimiy va yana besh eronlik zobit ham halok bo‘lgandi. Shuningdek, uch nafar Suriya va bir nafar Livan fuqarosi vafot etgan.
Bunga javoban 14-aprel kuni Eron tunda 300 dan ortiq dron, qanotli va ballistik raketalar bilan Isroilga hujum qilgandi. Isroil armiyasi mamlakatga yaqinlashgan raketa va dronlarning 99 foizi Arrow uzoq masofali raketaga qarshi mudofaa tizimi va qiruvchi samolyotlar tomonidan yo‘q qilinganini ta’kidlagan. Eron harbiy shtab-kvartirasi hujumni “muvaffaqiyatliroq” deb atagan va javob hujumi bo‘lgan taqdirda “kattaroq kuch bilan” zarba berishni va’da qilgan.
Izoh (0)