АҚШ президенти Жо Байденнинг ўғли Хантер Байден гиёҳванд моддалар истеъмол қилиб юрган вақтида ноқонуний равишда қурол сотиб олиш ва сақлашда айбланди, деб хабар бермоқда CNN.
Телеканал маълумотларига кўра, айбловнинг иккита банди 2018 йилда АҚШ президентининг ўғли тўппонча сотиб олаётганда гиёҳванд моддаларни истеъмол қилмаслиги ҳақида ёлғон гапиргани билан боғлиқ. Учинчи пунктда айтилишича, Хантер Байден гиёҳванд моддаларни истеъмол қилиб юрган пайтдларда ўқотар қуролга ҳам эгалик қилган. CNN буларнинг барчаси федерал жиноят эканига аниқлик киритди.
New York Times газетасининг ёзишича, агар айбдор деб топилса, Хантер Байден 25 йилгача қамоқ жазоси ва 750 минг доллар жаримага тортилиши мумкин.
Хантер Байденга нисбатан тергов 2018 йилда бошланган. 2023 йил ёзида президентнинг ўғли АҚШ Адлия вазирлиги билан келишув тузди, унга кўра у 2017—2018 йилларда содир этилган иккита солиқ қонунбузарлиги бўйича айбини тан олиши, бунинг эвазига Хантерга қарши қуролларни ноқонуний сақлаш айбловлари икки йилдан кейин олиб ташланиши керак эди. Бироқ келишув 26 июль куни суд томонидан тасдиқланмади, иш бўйича махсус прокурор Девид Уайсс бу масала бўйича музокаралар боши берк кўчага кириб қолгани ва тўхтатилганини айтди.
Изоҳ (0)