АҚШ президентининг ўғли, тадбиркор Хантер Байден солиқ тўлашдан бўйин товлаганликда айбланмоқда. Бу ҳақда Калифорниядаги Катта ҳакамлар ҳайъати хулосасида айтилади.
Прокурорларнинг таъкидлашича, кичик Байден 2016 йилдан 2020 йилгача камида беш йил давомида 1,4 миллион доллар солиқни тўламаган, шунингдек, ёлғон декларациялар тақдим этган.
2016 йилдан 2020 йил 15 октябргача судланувчи бу пулни (солиқ тўлаш учун ишлатилиши мумкин бўлган маблағ) гиёҳванд моддалар, эскортлар ва машуқалари, ҳашаматли меҳмонхоналар ва ижара мулклари, экзотик машиналар, кийим-кечак ва бошқа шахсий буюмларга, умуман олганда, солиқлардан ташқари ҳамма нарсага сарфлаган, — деб таъкидлади ҳакамлар ҳайъати аъзолари.
Ҳаммаси бўлиб, айблов хулосаси тўққизта бандни ташкил этди.
CNN аниқлик киритишича, махсус прокурор Дэвид Вайс сўнгги ҳафталарда Хантер Байденга қарши жиноий айбловлар билан боғлиқ кўрсатма ва далиллар тўплаган. Август ойида у Байден судга тортилиши мумкинлигини айтганди.
Сентябрь ойида Америка президентининг ўғлига қурол сотиб олишда ҳуқуқбузарлик айби қўйилганди. У 2018 йилда Colt Cobrа 38 махсус револьверини харид қилиш чоғида анкетани тўлдираётиб гиёҳванд моддалар истеъмол қилмаслиги ҳақида ёлғон маълумот берган. Ўша пайтда у кокаинга қарамлик билан курашаётган эди.
Хантер Байден гиёҳванд моддаларни истеъмол қилиши ҳақида The Wall Street Journal нашри 2014 йилда ёзганди. Президентнинг ўғли унда кокаин аниқланганидан кейин ҳарбий-денгиз флоти захирасидан чиқарилган. У 2013 йил май ойидан бери ҳарбий-денгиз кучлари захирасида.
Бундан ташқари, Байден 2017 — 2018 йилларда топган 1,5 миллион доллардан ортиқ даромадидан бюджетга 100 минг доллардан ортиқ солиқ тўлашдан бўйин товлаганликда айбланмоқда.
Хантер Байден солиқ тўлашдан бўйин товлаганлик ва ноқонуний қурол сақлашда айбини тан олишга ҳамда гиёҳвандликдан даволанишга тайёрлигини билдирганди, бироқ судья келишувни тасдиқлашдан бош тортди.
Изоҳ (0)