Тожикистон бош вазири Қоҳир Расулзоданинг қудаси Муқим Ашуров фирибгарликда гумонланиб ҳибсга олинди. Бу ҳақда Озодлик радиоси хабар берди. Маълумотни Сўғд вилояти Ички ишлар вазирлиги тасдиқлади.
Маълум қилинишича, Муқим Ашуровга нисбатан 8 май куни жиноий иш қўзғатилган. 65 ёшли Ашуров Хўжанддаги тергов изоляторига жойлаштирилган ва унинг яқинлари бу ҳақда изоҳ беришдан бош тортган. Сўғд вилояти Ички ишлар вазирлиги матбуот котиби Акбар Шарифов “Муқим Ашуровга нисбатан иш бўйича тергов Тожикистон Жиноят кодексининг 247-моддаси 4-қисм (йирик ҳажмдаги фирибгарлик) бўйича олиб борилаётгани”ни айтган. Тегишли иш жарима ёки 8 йилдан 12 йилгача озодликдан маҳрум қилиш тарзидаги жазони назарда тутади.
“Аниқланишича, у бир неча йил аввал Хўжанд шаҳрида яшовчи фуқаронинг ишончига кириб, тўрт қаватли дўконни сотиш учун 320 минг доллар олган. Аммо кейин бу дўконни бошқа шахсга сотиб юборган, бироқ олинган суммани қайтармаган”, — деди Шарифов.
Ашуров ва адвокатининг фикри номаълум, унинг яқинлари ҳам матбуот билан мулоқот қилишдан бош тортган. Айбланувчининг оиласига яқин шахслардан бири Озодлик радиоси билан суҳбатда “муаммо ҳал қилиниши керак”лигини айтган. Гап “даъвогарга етказилган зарар яқин орада қопланиши” ҳақида кетмоқда.
Ашуровнинг ўғли Парвиз Ашуров Тожикистон бош вазирининг тўнғич қизига уйланган. Айбланувчини ҳибсга олиш Қоҳир Расулзоданинг Дубай, Душанбе ва Хўжанддаги энг яқин қариндошларининг мол-мулкига оид маълумотлар бўйича журналистик суриштирув эълон қилинганидан кейин содир бўлди. Ушбу материал ижтимоий тармоқларнинг тожик сегментида катта резонанс келтириб чиқарди.
16 май куни Озодлик радиосида Тожикистон бош вазири рафиқаси Иқболхон Нозированинг Дубайда кўчмас мулки борлиги ҳақида мақола эълон қилинди. Маълумот эълон қилинган куннинг эртасига 17 май куни Тожикистон бош вазирига тегишли бўлган электрон почта манзилидан Озодлик радиосига “Тожикистон бош вазири котибияти” имзолаган мактуб юборилди.
“Ижтимоий тармоқларда Озодлик радиосининг 2024 йил 16 майдаги материалига жавобан шуни маълум қиламизки, ушбу материалда Тожикистон бош вазирининг рафиқасига тегишли бўлган виллалар ҳақидаги маълумотлар ҳақиқатга тўғри келмайди”, — дейилади мактубда.
Бунга жавобан Озодлик радиоси унда мазкур маълумотни тасдиқлашни сўраб хат жўнатган. Ҳозирча мурожаатга ҳеч ким жавоб бермаган.
Изоҳ (0)