Tojikiston bosh vaziri Qohir Rasulzodaning qudasi Muqim Ashurov firibgarlikda gumonlanib hibsga olindi. Bu haqda Ozodlik radiosi xabar berdi. Ma’lumotni So‘g‘d viloyati Ichki ishlar vazirligi tasdiqladi.
Ma’lum qilinishicha, Muqim Ashurovga nisbatan 8-may kuni jinoiy ish qo‘zg‘atilgan. 65 yoshli Ashurov Xo‘janddagi tergov izolyatoriga joylashtirilgan va uning yaqinlari bu haqda izoh berishdan bosh tortgan. So‘g‘d viloyati Ichki ishlar vazirligi matbuot kotibi Akbar Sharifov “Muqim Ashurovga nisbatan ish bo‘yicha tergov Tojikiston Jinoyat kodeksining 247-moddasi 4-qism (yirik hajmdagi firibgarlik) bo‘yicha olib borilayotgani”ni aytgan. Tegishli ish jarima yoki 8 yildan 12 yilgacha ozodlikdan mahrum qilish tarzidagi jazoni nazarda tutadi.
“Aniqlanishicha, u bir necha yil avval Xo‘jand shahrida yashovchi fuqaroning ishonchiga kirib, to‘rt qavatli do‘konni sotish uchun 320 ming dollar olgan. Ammo keyin bu do‘konni boshqa shaxsga sotib yuborgan, biroq olingan summani qaytarmagan”, — dedi Sharifov.
Ashurov va advokatining fikri noma’lum, uning yaqinlari ham matbuot bilan muloqot qilishdan bosh tortgan. Ayblanuvchining oilasiga yaqin shaxslardan biri Ozodlik radiosi bilan suhbatda “muammo hal qilinishi kerak”ligini aytgan. Gap “da’vogarga yetkazilgan zarar yaqin orada qoplanishi” haqida ketmoqda.
Ashurovning o‘g‘li Parviz Ashurov Tojikiston bosh vazirining to‘ng‘ich qiziga uylangan. Ayblanuvchini hibsga olish Qohir Rasulzodaning Dubay, Dushanbe va Xo‘janddagi eng yaqin qarindoshlarining mol-mulkiga oid ma’lumotlar bo‘yicha jurnalistik surishtiruv e’lon qilinganidan keyin sodir bo‘ldi. Ushbu material ijtimoiy tarmoqlarning tojik segmentida katta rezonans keltirib chiqardi.
16-may kuni Ozodlik radiosida Tojikiston bosh vaziri rafiqasi Iqbolxon Nozirovaning Dubayda ko‘chmas mulki borligi haqida maqola e’lon qilindi. Ma’lumot e’lon qilingan kunning ertasiga 17-may kuni Tojikiston bosh vaziriga tegishli bo‘lgan elektron pochta manzilidan Ozodlik radiosiga “Tojikiston bosh vaziri kotibiyati” imzolagan maktub yuborildi.
“Ijtimoiy tarmoqlarda Ozodlik radiosining 2024-yil 16-maydagi materialiga javoban shuni ma’lum qilamizki, ushbu materialda Tojikiston bosh vazirining rafiqasiga tegishli bo‘lgan villalar haqidagi ma’lumotlar haqiqatga to‘g‘ri kelmaydi”, — deyiladi maktubda.
Bunga javoban Ozodlik radiosi unda mazkur ma’lumotni tasdiqlashni so‘rab xat jo‘natgan. Hozircha murojaatga hech kim javob bermagan.
Izoh (0)