“Байден Украина бўйича тинчлик саммитига керак” — Зеленский

Украина президенти Владимир Зеленский Брюсселда бўлиб ўтган матбуот анжуманида АҚШ президенти Жо Байден Швейцария томонидан ташкил этилган Украина бўйича тинчлик саммитида қатнашмаса, бу “жуда кучли қарор” бўлмаслигини айтди, дея Deutsche Welle хабар берди.

Байден жаҳон саммитига керак. Унинг йўқлигини Путин шахсан олқишлайди, — деди Зеленский.

У Россия президенти Владимир Путин тинчлик саммитидан жуда қўрқиши ва уни бузишга уринишда давом этишига ишонч билдирган.

Украина президентига кўра, Киев саммитда иштирок этиш бўйича Хитой, Бразилия ва Африканинг бир қанча давлатларидан “ижобий сигналлар олинган” жавобни кутмоқда ва бу ташаббусни қўллаб-қувватлаган барча давлатларга миннатдорчилик билдирмоқда.

Агар сиз тинчликни хоҳласангиз, у ерда бўласиз. Агар сиз урушни хоҳласангиз, Россия уюштирмоқчи бўлган йиғинга борасиз, — дея қўшимча қилган Зеленский.

Аввалроқ Украина ва Бельгия хавфсизлик бўйича ҳамкорлик юзасидан шартнома имзолаган эди. Бельгия Украина билан бирга икки томонлама хавфсизлик шартномаси тузган 11-давлат бўлган.

Украина бўйича тинчлик конференцияси 15 —16 июнь кунлари Люцернда бўлиб ўтади. Швейцария ҳукуматига кўра, жаҳон саммитига 160 делегация таклиф қилинган.