Грузия парламенти кўпчилик овоз билан президент Саломе Зурабишвилининг “Хорижий агентлар” тўғрисидаги мунозарали қонунга вето қўйишини бекор қилишга муваффақ бўлди. Бу ҳақда BBC хабар берди.
Ушбу қонуннинг қабул қилиниши Грузия жамиятининг норозилигига, АҚШ ва Европа Иттифоқининг танқидига ҳамда Тбилисида кенг кўламли намойишларга сабаб бўлган.
Ҳукмрон “Грузия орзуси” партиясидан 84 депутат президент ветосини бекор қилиш учун овоз берган. Президент ветосини бекор қилиш учун парламентдаги 150 нафардан камида 76 нафарининг овози керак бўлган.
Мухолифатдаги Бирлашган миллий ҳаракат партияси депутати Анна Ситлидзенинг айтишича, хорижий агентлар ҳақидаги қонун кўп муаммоларни келтириб чиқаради.
Бизнинг Европа Иттифоқига киришимиз тақиқланади, Грузия учун Европа билан визасиз режим бекор қилиниши мумкин. Ғарб давлатлари бизга қарши санкциялар жорий этиши аниқ, бу Грузия иқтисодиётига бевосита таъсир қилади, — дейди депутат.
Ситлидзега кўра, амалдаги ҳокимият вакиллари ўзларининг ўйламасдан олиб бораётган сиёсати билан жамиятда қарама-қаршиликларни келтириб чиқарган. Ҳукмрон партия вакиллари ўз рақибларини Грузия манфаатларига хиёнат қилишда айблаган.
Эслатиб ўтамиз, аввалроқ Грузия президенти Саломе Зурабишвили мамлакат парламенти томонидан учинчи ўқишда қабул қилинган, “Хорижий таъсирнинг очиқлиги тўғрисида”ги қонунга вето қўйган эди.
Изоҳ (0)