Украина президенти Владимир Зеленский АҚШ Конгрессига Киевга янги ёрдам пакети ҳақидаги қарори учун миннатдорчилик билдириб, мазкур ёрдам Кремль учун Украина иккинчи Афғонистонга айланмаслиги ҳақида сигнал эканлигини таъкидлади.
Қўшма Штатлар Украинани қўллаб-қувватлайди, унинг фуқаролари ва бутун дунёда демократияни ҳимоя қилади. Биз иложи борича тезроқ фронтдаги аскарлар учун зарур ёрдамни олишни истаймиз, — деди у.
Зеленскийга кўра, АҚШ янги ёрдам пакетини маъқуллаганидан сўнг Украина жанг майдонидаги вазиятни барқарорлаштириш ва ташаббусни қўлга олиш имкониятига эга бўлади, чунки Украина армияси янги қуролларга муҳтож.
Менимча, бу ёрдам қуролли кучларни чиндан ҳам кучайтиради, агар биз ҳақиқатан ҳам жуда зарур бўлган қурол тизимини олсак, ғалаба қозониш имкониятига эга бўламиз, — қўшимча қилди Украина раҳбари.
Бир кун аввал республикачилар ва АҚШ Конгрессининг Вакиллар палатаси бир неча ойлик қарама-қаршиликлардан сўнг Украинага қарийб 61 миллиард доллар миқдоридаги кенг кўламли ёрдам пакетини маъқуллади. Қонун лойиҳасини 311 конгрессмен маъқуллаган, 112 киши қарши овоз берган.
Қуйи палата маъқуллаганидан кейин қонун лойиҳаси Сенат томонидан қабул қилиниши керак. Овоз бериш 23 апрелга белгиланган. АҚШ президенти Жо Байден бу ҳужжатни дарҳол имзолашини айтган.
АҚШ қонун чиқарувчи органида демократлар ва республикачилар ўртасидаги Украинага кейинги ёрдам масаласидаги зиддият 2023 йил охиридан бери давом этмоқда.
Изоҳ (0)