Исроил ҲАМАС томонидан гаровга олинганларни озод қилиш ва Ғазо секторида ўт очишни тўхтатиш бўйича янги таклифларини воситачиларга – Қатар, Миср ва АҚШга топширди. Бу ҳақда икки манбага таяниб, Axios хабар берди.
Манбаларга кўра, Исроил расмийлари айрим талабларни юмшатишга тайёр. Жумладан, биринчи босқичда озод қилинадиган гаровга олинганлар сони бўйича “мослашувчан бўлишга тайёрлик” билдирилган. Бундан ташқари Исроил ҲАМАСнинг ўт очишни узоқ муддатга тўхтатиш ҳақидаги талабларини муҳокама қилишни ҳам режалаштирмоқда.
“Бу янги ташаббус ва у жиддий”, — дейди Axios манбаси.
Қатар расмийлари Исроил таклифини яқин вақт ичида ҲАМАС вакилларига етказиши кутилмоқда.
- 23 май куни Исроил икки ҳафталик танаффусдан сўнг воситачилар орқали ҲАМАС билан музокараларни қайта бошлашни маъқуллади. Исроил баъзи масалаларда ўз позициясини кескинлаштирди. Бунинг ортидан ҲАМАС вакиллари агар Исроил Рафаҳдаги операцияни ва умуман урушни тўхтатмаса, музокаралардан бош тортишини маълум қилди.
- 25 май куни Исроил Ғазода гаровга олинганларни озод қилиш бўйича музокараларни янгилаш ниятида экани хабар қилинди. Янги таклиф Исроилнинг музокара гуруҳи томонидан ишлаб чиқилган. Аммо мудофаа вазирлиги расмийларининг фикрича, Исроил вақтинчалик ўт очишни тўхтатишга рози бўлган тақдирда ҳам бир неча ойдан сўнг керак бўлганда яна урушга қайтиши мумкин.
Изоҳ (0)