Исроил Мадримов Кроуфордга қарши жанг ҳақида: Ҳали эрта эди, дейдиганлар бор. Лекин вақти келди

Супер ярим ўрта вазн тоифасида WBA камари соҳиби Исроил Мадримов 3 август куни Теренс Кроуфордга қарши жанг қилади.

Мадримов бўлажак жанг ҳақида ўз фикрларини билдириб ўтди.

“Ҳали эрта эди, дейдиганлар бор. Бунақа имконият яна бўладими, йўқми? Бундай жангни кўпчилик хоҳлайди. Лекин имконият бўлмайди, тўғри келмайди.

Бизда ҳозир шундай имконият бор. Бундан фақат фойдаланиш керак. Эрта-кеч деган гап керак эмас. Инша Аллоҳ, вақти келди деб, ўйлайман”, — дейди Мадримов.

Қайд этиб ўтиш жоиз, ўтган йилнинг 30 июль куни Кроуфорд ҳамюрти Эррол Спенсни тўққизинчи раундда техник нокаутга учратиб, ярим ўрта вазн тоифасида мутлақ жаҳон чемпионига айланган эди.

Америкалик чемпион профессионал рингда ўтказган 40 та жангининг барчасида ғалаба қозонган. Ғалабаларининг 31 тасига нокаут орқали эришган.

Эслатиб ўтамиз, Исроил Мадримов 8 март оқшомида Саудия Арабистонининг Ар-Риёд шаҳрида россиялик Магомед Курбановни 5-раундда нокаутга учратиб, WBA камарини қўлга киритганди.