Грузияда ҳукумат қароридан норози бўлиб, намойишга чиққан 63 нафар фуқаро ҳибсга олинди

Грузия пойтахти Тбилисида ҳукуматнинг “Хорижий агентлар тўғрисида”ги қонунига қарши норозилик билдириб, намойишга чиққан 63 киши ҳибсга олинди. Бу ҳақда Anadolu нашри хабар берди.

Мамлакат Ички ишлар вазирлиги хабар беришича, намойишчиларни тарқатиш жараёнида 6 нафар хавфсизлик ходими турли даражада жароҳат олган. Тбилисидаги намойишчилар куч билан тарқатиб юборилган.

Вазирлик “майда безорилик ва итоатсизлик” учун 63 шахс ҳибсга олинганини расман маълум қилган. Ҳибсдагилар аҳволи тўғрисида қўшимча маълумот берилмаган.

Манбада айтилишича, намойишчилар Грузия парламенти олдига тўпланган. Улар парламент биносига кириш ва чиқиш йўлларини тўсиб қўйган.

“Милиция ходимлари томонидан маъмурий бинони тўсмаслик ва қонунда белгиланган доирада норозилик намойишини давом эттириш тўғрисидаги кўплаб чақириқлар, шунингдек, ИИВ томонидан эълон қилинган баёнотларга қарамай, улар (намойишчилар) қонун ҳужжатларида белгиланган кўрсатмаларга амал қилмаган. Ҳуқуқ-тартибот идоралари ходимларига қаршилик қилиб, кириш йўлларини қасддан тўсиб қўйишда давом этишди”, — дейилади расмий хабарда.

Грузиянинг етакчи мухолифат партияси – “Ягона миллий ҳаракат” раҳбари Леван Хабеишвили ҳам митингда иштирок этгани хабар қилинган. Кейинчалик у жароҳат олиб, тиббий муассасага олиб кетилгани айтилган.

Ўтган ойда Грузиядаги парламент ҳукмрон “Грузия орзуси” партияси томонидан тақдим этилган “хорижий агентлар” тўғрисидаги қонун лойиҳасини кўриб чиқишини эълон қилганидан кейин оммавий норозилик намойишлари авж олди. Қонун лойиҳасида маблағининг 20 фоиздан ортиғини хориждан оладиган ташкилотлар, жумладан, оммавий ахборот воситалари давлат рўйхатидан ўтиши шартлиги белгилаб қўйилган. Шунингдек, бундай ташкилотларга йиллик молиявий ҳисоботларни эълон қилиш мажбурий қилиб белгиланган.

2023 йилнинг март ойидаёқ қонун лойиҳасига қарши бўлган 66 киши ҳибсга олингани хабар қилинган эди. Шунингдек, тартибсизликларда 50 дан ортиқ ҳуқуқ-тартибот ходимлари жароҳатланган.

Танқидчилар қонун лойиҳаси демократияга путур етказишини айтишган. Қатор сиёсий доиралар қонун лойиҳасини Ғарб таъсирини Москва фойдасига чеклашга қаратилган “Россия қонуни” деб номлашган. Бироқ ҳукмрон партия бу қонун ошкораликни кучайтиришини билдирган.

Грузия президенти Саломе Зурабичвили қонун лойиҳасига вето қўйишини маълум қилган. Бироқ “Грузия орзуси” 76 та овоз тўплаш орқали ветони бекор қилиши мумкин. Шундан сўнг парламент спикери уни имзолаши мумкин бўлади.