Ҳиндистонда бортида 179 нафар йўловчи бўлган Аir India Express компаниясининг Airbus А320 самолётида ёнғин чиқди. Бу ҳақда Times of India хабар берди.
Самолёт 20 май куни Бангалордан Кочига парвоз қилаётган бўлган. Ҳавога кўтарилганидан 10 дақиқа ўтгач, двигателлардан бири ёниб кетган. Самолёт аэропортга қайтиб, фавқулодда қўнишни амалга оширган. Барча йўловчилар эвакуация қилинган.
Таъкидланишича, бу охирги бир неча кун ичида Air India бортида содир бўлган иккинчи ёнғин. 17 май куни авиаташувчининг Бангалорга йўл олган самолётларидан бири ёнғин чиқиши ҳақида огоҳлантирилгандан сўнг Деҳлига қайтганди.
Авиакомпания сўнгги фавқулодда ҳолатга изоҳ берар экан, ҳодиса натижасида йўловчилар жабрланмаганини маълум қилди.
“Ёнғин сабабларини аниқлаш учун ваколатли давлат органлари билан биргаликда чуқур текширув ўтказилади”, — дейилади компания хабарида.
Бангалор аэропорти вакилига кўра, “тўлиқ миқёсда фавқулодда ҳолат эълон қилинган, самолёт қўнгандан сўнг ёнғин тезда ўчирилган”.
Эслатиб ўтамиз, 19 май куни Эрон президенти Иброҳим Раисий авиаҳалокат натижасида ҳалок бўлди. Мамлакат шимоли-ғарбида Эрон президенти ва ташқи ишлар вазири бўлган вертолёт ҳалокатга учраганди.
Кучли туман ва тоғли ҳудуд туфайли ҳалокатга учраган вертолётни қидириш 10 соатдан ортиқ давом этган. Мутахассислар фикрича, фалокат техник носозлик ёки инсон омили туфайли юз берган бўлиши мумкин. Раисий вафоти муносабати билан Эронда беш кунлик мотам эълон қилинган. Эрон президентининг дафн маросими 23 май куни Машҳад шаҳрида бўлиб ўтади. Муддатидан олдин президентлик сайловлари 28 июнга белгиланган.
Изоҳ (0)