Авиаҳалокатда ҳалок бўлган Эрон президенти Иброҳим Раисийнинг дафн маросими 23 май куни Эроннинг Машҳад шаҳрида ўтказилади. Бу ҳақда мамлакат вице-президенти Муҳсин Мансурий баёнотига асосланиб, “ТАСС” нашри хабар берди.
Эроннинг шимоли-шарқидаги Машҳад шаҳрида дафн маросимига тайёргарлик бошланган. Маросимда кўп сонли оломон тўпланиши инобатга олиниб, хавфсизлик чоралари кучайтирилган.
“Оятуллоҳ Раисий дафн маросими пайшанба куни кечқурун Имом Ризо мақбарасида бўлиб ўтади”, — дейилган ИРИБ телеканали орқали эълон қилинган хабарда.
Машҳад марҳум Эрон президентининг она шаҳри бўлиб, мамлакат шиаларининг зиёрат марказларидан бири ҳисобланади. Ушбу шаҳарда барча расмий маросимларини бекам-у кўст бажариш учун дафн маросимини ташкил этиш қўмитаси ташкил этилгани хабар қилинган.
Ҳозирда Эроннинг кўплаб шаҳарларида шаҳидлар билан видолашув тадбирлари ўтказилаётгани билдирилган. Иброҳим Раисий жасади Теҳрон бош масжидига олиб кетилган. У билан ҳамроҳ бўлиб ҳалок бўлган олий давлат амалдорлари жасадлари эса Теҳрондан унча узоқ бўлмаган Қум шаҳридаги масжидга юборилгани билдирилган.
- Маълумот ўрнида, 19 май куни Эроннинг Шарқий Озарбайжон вилоятида ичида Эрон президенти бўлган вертолёт ҳалокатга учради.
- Вертолёт бортида ташқи ишлар вазири Ҳусайн Амир Абдуллоҳиён, Шарқий Озарбайжон вилояти губернатори Оятуллоҳ ал-Ҳошим ва Табриз имоми Муҳаммад Али ал-Ҳошим ҳам бўлган.
- Эрон Қизил ярим ой жамияти раҳбари Пир Ҳусайн Коливанднинг айтишича, ҳалокатда вертолётнинг барча йўловчилари ва экипажи ҳалок бўлган.
- Ҳалокат сабабларини ўрганиш учун комиссия тузилган. Биринчи вице-президент Муҳаммад Мохбер Эрон президенти вазифасини бажарувчи этиб тайинланган.
- Муддатидан олдин президентлик сайловлари 28 июнга белгиланган.
Изоҳ (0)