Индонезияда парвоз вақти учувчилар ухлаб қолди

Индонезияда маҳаллий Batik Air авиакомпаниясининг икки учувчиси парвоз вақтида 28 дақиқа давомида ухлаб қолди. Бу ҳақда BBC хабар берди.

Ҳодиса 25 январь куни Сулавесидан Жакартага парвоз қилаётган самолётда содир бўлган. Учувчилардан бири янги туғилган эгизакларига қарагани учун чарчаганини, шу сабабли иш вақтида ухлаб қолганини айтган.

Airbus А320 қисқа муддатга йўналишдан чиқиб кетган, бироқ хавфсиз қўнган. Барча 153 йўловчи ва экипаж аъзолари ҳеч қандай зарар кўрмаган. 32 ёшли учувчи ҳавога кўтарилганидан ярим соат ўтгач, иккинчи учувчига бошқарувни топширган. Транспорт вазирлиги хабарига кўра, 28 ёшли иккинчи учувчи бунга рози бўлган.

Аммо иккинчи учувчи ҳам беихтиёр ухлаб қолган. Хабарда айтилишича, унинг рафиқаси эндигина бир ойлик эгизак чақалоқларни дунёга келтирган ва учувчи рафиқасига бола парваришида ёрдам берган. Жакарта ҳаво ҳаракатини бошқариш хизмати Batik Air А320 самолётининг кокпити билан уланишга ҳаракат қилган, бироқ жавоб олмаган.

Радио сукунати етакчи учувчи уйғониб, иккинчи учувчи ҳам ухлаб қолганини англагунига қадар 28 дақиқа давом этган. Шунингдек, у самолёт қисқа муддатга йўналишдан чиқиб кетганини аниқлаган.

Шундан сўнг учувчилар Жакартадан келган қўнғироқларга жавоб берган ва самолётни эсон-омон қўндирган. Парвоз олдидан ўтказилган тиббий кўриклар эркаклар учишга яроқли эканини кўрсатган. Уларнинг қон босими ва юрак уриши нормал бўлган, спиртли ичимликлар тестлари салбий чиққан.

Аммо учувчилар тўлиқ дам олганга ўхшаса-да, синовлар уларнинг дам олиш сифати яхши эканини аниқлай олмади, — дейди авиация мутахассиси Алвин Ли.

Ҳодиса юзасидан расмийлар Batik Air авиакомпаниясига “қаттиқ танбеҳ” берган, Индонезия авиатранспорти раҳбари М. Кристи Эндаҳ Мурни Batik Air ўз экипажининг дам олиш вақтига кўпроқ эътибор қаратишини таъкидлади.

Batik Air “тегишли дам олиш сиёсати билан ишлаётганини” ва “хавфсизлик бўйича барча тавсияларни бажариш мажбуриятини олганини” айтди.