Словакия бош вазири Роберт Фицонинг ҳаёти хавф остида эмас, шифокорлар ижобий прогнозлар бермоқда. Бу ҳақда “Правда” хабар берди.
Бош вазир ўринбосари, мамлакат мудофаа вазири Роберт Калиняк бу бўйича маълумот берди. У Фицони бошқа шифохонага ўтказиш режаси йўқлигини таъкидлади. Калиняк бош вазирнинг аҳволи барқарор экани ва шифокорларнинг ижобий прогнози туфайли қўшимча маълумот клиника раҳбарияти томонидан берилишини айтди. Тиббиёт мутахассисларининг фикрича, Фицонинг соғлиғи тикланишига кўп вақт керак бўлади.
Шунингдек, бош вазир ўринбосари Фицога суиқасд уюштирилгани муносабати билан ички ишлар вазири Матус Шутай-Эштокнинг истеъфога чиқишига ҳеч қандай сабаб йўқлигини билдирди.
“Унинг истеъфоси ҳақидаги масала бутун вазиятни тушунмасликдан далолат беради”, — деди Калиняк.
Унинг сўзларига кўра, эндиликда мамлакат раҳбарияти ва аҳолиси “нима бўлганини таҳлил қилиши” керак.
Эслатиб ўтамиз, 15 май куни Словакия бош вазири Роберт Фицога суиқасд қилинди. Ҳукумат раҳбарига 71 ёшли мухолифатдаги ёзувчи Юрай Синтула бир неча бор ўқ узган. Шундан сўнг Фицо кўкрак қафаси ва қорин бўшлиғидаги жароҳатлар билан шифохонага олиб кетилиб, операция қилинган.
Ҳозирда бош вазирнинг саломатлигига ҳеч қандай хавф йўқ. Юрай Синтула сиёсий сабабларга кўра суиқасд уюштирганини таъкидлаган. У Вазирлар Маҳкамасининг ОАВ эркинлигини чеклашга қаратилган ҳаракатларидан норозилик билдирган.
Изоҳ (0)