Қозоғистоннинг Қўстаной вилоятидаги 17 та қишлоқ аҳолиси спиртли ичимлик истеъмолидан бутунлай воз кечди. Бу ҳақда Нур.кз хабар берди.

Вилоятда маст ҳолда содир этилган жиноятлар сони 3,3 фоизга камайган. Бунга “Маданий жамият” лойиҳаси сабаб бўлган, унинг доирасида 17 та қишлоқ аҳолиси алкоголдан бутунлай воз кечган.
Лойиҳа жамоатчилик томонидан фаол қўллаб-қувватланмоқда. Шаҳар ва қишлоқларда жамоат комиссиялари ташкил этилган, уларнинг таркибига фуқаролар, оқсоқоллар, диний уламолар ва маҳаллий фаоллар киради. Улар спиртли ичимликка ружу қўйган инсонларга ёрдам кўрсатиб, маънавий қўллаб-қувватлайди ҳамда тушунтириш ишларини олиб боради, дейди Ички ишлар вазирлиги.
Йил бошидан бери судлар томонидан спиртли ичимликларни, ҳатто уй шароитида истеъмол қилишни ҳам тақиқлаш бўйича 2 600 та қарор қабул қилинган. Шу орқали жамоат тартибини бузишга мойил шахслар, оилавий зўравонлар ва сурункали ичкиликбозлик каби “хавфли гуруҳлар” устидан назорат кучайтирилган.
Маълумот учун, “Маданий жамият” лойиҳаси 2024 йил сентябридан Қўстаной вилоятида амалга оширилмоқда. Унинг мақсади жиноятчиликнинг олдини олиш, зарарли одатларга қарши курашиш ва соғлом маданий муҳитни шакллантиришдан иборат.
Изоҳ (0)