Бразилия Олий суди мамлакатнинг собиқ президенти Жаир Болсонарони уй қамоғига олиш тўғрисида қарор чиқарди. У ҳокимиятни ноқонуний йўл билан эгаллаш режасини тузганликда айбланмоқда, аммо собиқ президент бу даъвони рад этмоқда. Бу ҳақда BBC хабар берди.
Судья Александре де Морайсга кўра, бу қарор Болсонаро июль ойида унга нисбатан белгиланган чекловларга амал қилмагани сабабли қабул қилинган. Собиқ президентнинг юристлари бу чекловлар бузилмаганини таъкидлаб, Олий суд қарорига қарши шикоят қилмоқчи эканини билдирган. Улар суд қарорининг асоссизлигини айтмоқда.
АҚШ Давлат департаменти собиқ президентнинг уй қамоғига ҳукм қилингани юзасидан баёнот бериб, бу қарорни қоралаган ва ушбу “ноқонуний ҳаракатларга кўмаклашаётганлар жавобгарликка тортилишини” маълум қилган.
АҚШ президенти Дональд Трамп эса Болсонарога нисбатан олиб борилаётган суд жараёнини “жодугарлик ови” деб атамоқда. Президент ушбу ишни сабаб қилиб кўрсатган ҳолда, Бразилиядан импорт қилинадиган айрим маҳсулотларга 50 фоизлик бож жорий этишини эълон қилган — гарчи АҚШ ва Бразилия ўртасида савдо баланси мавжуд бўлса-да.
Судья де Морайснинг айтишича, Болсонаро ўзининг сиёсий иттифоқчилари, хусусан, ўғиллари орқали ижтимоий тармоқларда Бразилия суд тизимига четдан аралашувга ва уни қоралашга ундовчи постларни тарқатган.
Бразилиянинг бир қанча шаҳарларида 3 август куни Болсонаро тарафдорлари норозилик намойишларини ўтказган. Унинг ўғли, сенатор Флавио Болсонаро Рио-де-Жанейродаги митингда отасинининг фикрларини телефон орқали оммага етказган. Кейинроқ у бу видеони ижтимоий тармоққа жойлаштирган, аммо кейин уни ўчириб юборган. Судья айнан шу ҳолатни асос қилиб, Болсонаронинг илгари белгиланган чекловларга атайин риоя қилмаганини таъкидламоқда.
“Огоҳлантириш чораларини қўпол равишда менсимаслик шу қадар аниқ эдики, айбланувчининг ўғли, сенатор Флавио Нантес Болсонару қонунбузарликни яшириш учун Instagramдаги саҳифасидан постни ўчириб ташлашга қарор қилди”, дейилади суд қарорида.
Суд, шунингдек, собиқ президентга одамлар билан учрашишни (фақат юристлар ёки суд томонидан рухсат этилган шахслар бундан мустасно) ва телефон ишлатишни тақиқлаган.
“Адолат кўр, лекин аҳмоқ эмас. Судланувчи сиёсий ва иқтисодий қудратга эга дегани унинг судни аҳмоқ қилишига йўл қўйилади дегани эмас” деб қўшимча қилган судья.
Қайд этилишича, ушбу чекловлар Болсонаро АҚШ президентини Бразилиядаги ички ишларга аралашишга ундаётгани ортидан жорий этилмоқда.
Маълумот учун, Трамп Болсонаро билан унинг президентлик даврида яқин муносабатда бўлган, жумладан улар 2019 йилда Оқ уйда учрашган. Июль ойида Трамп ижтимоий тармоқларда Болсонаро тарафини олган ҳолда унинг айбсизлигини айтганди. Шунингдек, Жаир Болсонарони Трамп “мамлакатини чин дилдан севувчи кучли лидер” сифатида мақтаган.
Изоҳ (0)