“Манчестер Юнайтед” бош мураббийи Рубен Аморим ўзининг клубдаги келажаги ҳақида фикр билдирди. У Sky Sports нашрига берган интервьюсида агар имкон бўлса, манкунианликлар сафида 20 йил ишлашни исташини айтиб ўтди.
Аморимнинг айтишича, унинг энг катта орзуси – “Манчестер Юнайтед”да узоқ йиллар фаолият юритиш ва клуб билан биргаликда совринлар ютишдир.
Энг катта орзум — “Манчестер Юнайтед”да узоқ вақт қолиш ва улар билан кўплаб совринларни қўлга киритиш. Бу ерда камида 20 йил ишлашни истайман. Бу менинг энг катта мақсадим ва унга ишонаман. Албатта, бу биз эришадиган натижаларга боғлиқ бўлади. Ўтган мавсум менга бўлган ишонч деярли ўз чегарасига етганини тушунаман. Шунга қарамай, ҳаммасини бошидан бошлашга тайёрман, дейди Аморим.
Португалиялик мутахассис аввалги жамоаси — “Спортинг”даги фаолияти ҳақида ҳам гапирди:
“Спортинг”да менга уч ойда ишдан кетасан, дейишган эди. Ҳатто, кубок ютиш эҳтимолим атиги 3 фоиз, дейилган. Ҳозир “Юнайтед”да ҳам шундай босим бор. Лекин мен клубни тез-тез ўзгартириш тарафдори эмасман. Одамлар билан мустаҳкам муносабатлар ўрнатишни ёқтираман. “Манчестер Юнайтед” мени эмас, мен уларни танладим. Бу клуб менга мос тушишини ҳис қилдим. Имконият бор экан, бу ерда қоламан.
Маълумот учун, “Манчестер Юнайтед” ўтган мавсум Англия Премьер Лигасида атиги 42 очко жамғариб, 15-ўринда якунлади. Шунингдек, “қизил иблислар” Европа Лигаси финалида “Тоттенҳэм”га мағлуб бўлиб, кейинги мавсум учун Чемпионлар Лигаси йўлланмасидан ҳам маҳрум бўлди.
Изоҳ (0)